د اسلاماباد سترې محکمې د پاکستان د پخواني لومړي وزیر نواز شریف، د هغه د لور مریم نواز او زوم کپټن صفدر سزا ځنډولې ده.
د دې هېواد د احتساب محکمې څو میاشتې وړاندې نواز شریف په ۱۰ کاله، مریم نواز په ۷ کاله او کپټن صفدر په یوه کال بند محکوم کړي وو.
د دې محکمې د پرېکړې له مخې نواز شریف، لور او زوم یې د روان کال جولای میاشتې په ۱۳مه له برېټانیا تر راستنېدو وروسته، د راولپنډۍ بندخونې ته لېږدول شوي وو.
خو د یادو کسانو وکیلانو د اسلاماباد ستره محکمه کې د هغوی لهپاره د استېناف غوښتنه کړې وه.
د پاکستان د محکمو له پرېکړو داسې ښکاري چې د نواز شریف په اړه د پاکستان احتسابي محکمې پرېکړه، له سیاسته، په ځانګړي ډول د دې هېواد له وروستیو ټاکنو چې عمرانخان پهکې د پاکستان لومړی وزیر شو، لرې ساتلو لهپاره شوې وه.
