د ولسي جرګې غړیو نن د جرګې د ریاست لپاره چې څلورو کسانو ورته ځانونه نومولي وو، ټاکنې وکړې، خو یوه نوماند هم ۵۰+۱ رایې چې ۱۲۲ کېدلې، خپلې نهکړې او ټاکنې د دوو نوماندانو ترمنځ دویم پړاو ته لاړې.
د جرګې ریاست لپاره میرویس یاسیني، عمر نصیر مجددي، میررحمان رحماني او کمال ناصر اصولي ځانونه نومولي وو.
له ټاکنو وروسته میرویس یاسیني ۵۹ رایې، عمر نصیر مجددي ۷ میررحمان رحماني ۷۵ او کمال ناصر اصولي هم ۶۹ رایې ترلاسه کړې.
تر رایې شمېرنې وروسته د ولسي جرګې لنډمهالي رییس عطاالله دهقانپور د ټاکنو د پایلو د اعلان ترڅنګ وویل چې یوه نوماند هم پنځوس جمع یو رایې و نه ګټلې او ټاکنې د دوو مخکښو نوماندانو ترمنځ دویم پړاو ته لاړې.
د یادونې ده چې د ولسي جرګې له ۲۵۰ غړیو نه ۱۴۲ یې حاضر وو او خپلې رایې یې وکارولې.
کمال ناصر اصولي او میررحمان رحماني د نن ورځې په ټاکنو کې له نورو نوماندانو ډېرې رایې خپلې کړې او دوی به د جرګې په راتلونکې عمومي غونډه کې چې ټاکل شوې د شنبې په ورځ جوړه شي، د ولسي جرګې د ریاست لپاره رقابت کوي.
د یادونې ده چې د ولسي جرګې د رییس تر ټاکل کېدو وروسته د جرګې د اداري پلاوي ټاکلو لپاره ټاکنې کېږي او وروسته هم د دې جرګې د کمېسیونونو د ریاست، مرستیالۍ او منشي لپاره ټاکنې کېږي.
دا په داسې حال کې ده چې ولسمشر محمداشرف غني شاوخوا شل ورځې وړاندې د ولسي جرګې اوولسمه تقنیني دوره پرانستله او د جرګې غړیو باید ورپسې خپلمنځي ټاکنې کړې وای، خو د کابل د ولسي جرګې ټاکنو د وروستیو پایلو تر اعلان پورې دا پروسه ځنډېدلې وه.
