افغانستان کې د ټاکنو څار بنسټونو ټولنې غړیو نن په کابل کې یوې خبري غونډې ته وویل چې د ولسمشرۍ په ټاکنو کې ۳ میاشتنی ځنډ له قانون سره په ټکر کې دی.
د ټاکنو خپلواک کمېسیون دوې ورځې مخکې اعلان وکړ چې د ځېنو لاملونو لهمخې به د ولسمشرۍ ټاکنې د ۱۳۹۸ کال د چنګاښ پر ۲۹مه ترسره شي؛ پهداسې حال کې چې پخوا د یادو ټاکنو لهپاره د ۱۳۹۸ کال د وري ۳۱ نېټه ښودل شوېوه.
د ټاکنو څار بنسټونو ټولنې غړي حبیبالله شینواري په خبري غونډې کې وویل چې د ولسمشرۍ ټاکنو کې ځنډ له اساسي قانون او د ټاکنو قانون سره په ټکر کې دی.
ښاغلي شینواري پهدې اړه د یاد بنسټ د خبرپاڼې د لوستلو پرمهال د ټاکنو نېټې په اړه پرېکړه خپلسره وګڼله چې راتلونکی مسوولیت یې هم د ټاکنو کمېسیون او حکومت پر غاړه دی. یاد بنسټ په خپلې خبرپاڼې کې دا پرېکړه په هېواد کې د ټاکنو پر بهیر د قانون واکمنتیا، ډیموکراسۍ او ټاکنیزو بنسټونو باندې د خلکو باور ته زیان بولي.
د ټاکنو څار بنسټونو ټولنې خبرپاڼې کې دا هم راغلي چې سیاسي ګوندونه باید د راتلونکیو ټاکنو بهیر مسلکي څارنې په برخه کې خپل څارنیز میکانیزم پیاوړی او لا سم کړي.
بلهخوا د ټاکنو خپلواک کمېسیون مرستیال ویاند ذبیحالله سادات وایي چې د ټاکنو خپواک کمېسیون مشرتابه پلاوي د سیاسي او جهادي مشران په ګډون د نړۍوالې ټولنې له استازیو، د ولسمشریزو ټاکنو راتلونکیو نوماندانو او حکومت سره له مشورو وروسته د ولسمشرۍ ټاکنو کې د ۳ میاشتني ځنډ په اړه پریکړه کړېده.
دغه راز، ځېنې مدني فعالان د ټاکنو خپلواک کمېسیون دالانشا ریس په ګډون ټول کمیشنران په ټنبلي او مالي فساد تورنوي او وایي چی په مرکزي او ولایتي کچه دې د دغه کمېسیون مشران له دندې ګوښه شي.
