د افغانستان د وزن پورته کولو ملي لوبډله نن د همدې برخې د فدراسیون لهخوا د فجر جام په ۴م پړاو سیالیو کې چې د مارچ په لومړۍ نېټه پیلېږي، د ګډون لپاره ایران ته لاره.
د افغانستان د بدني روزنې ریاست د معلوماتو له مخې، د ایران په کوربهتوب د فجر جام د ۴م پړاو سیالیو موخه د ۲۰۲۰ کال المپیک سیالیو ته هم د غوره لوبغاړیو غوراوی ښودل شوی دی.
یادې لوبې به د راتلونکې مارچ میاشتې په لومړۍ نېټه د ایران په پلازمېنه تهران کې پیل او ۵ ورځې به دوام وکړي.
د ورکړل شویو معلوماتو له مخې، له افغانستانه د سفر د مسوول محمداکرام نادري او روزونکي په ګډون ۵ کسیزه ملي لوبډله نن د ایران په لور خوځېدلې ده.
د یادونې ده چې د افغانستان په استازولۍ د ایران په کوربهتوب د فجر جام وزن پورته کولو سیالیو ته غوره شویو افغان لوبغاړیو تېر کال په یادو سیالیو کې د برونزو شپږ مډالونه ګټلي وو.
په همدې حال کې د افغانستان د تکواندو فدراسیون وایي، د ایران په کیش ښار کې د تکواندو له سیالیو وروسته د تکواندو نړیوال فدراسیون د افغانستان د تکواندو لوبڅار عبدالصبور عمري ته د ښې لوبڅارۍ او داورۍ له کبله ستاینلیک ورکړ.
د افغانستان د تکواندو فدراسیون زیاتوي، د تکواندو نړیوال فدراسیون د تکواندو په هغو سیالیو کې چې د کیش په کوربهتوب جوړې شوې وې، د عبدالصبور عمري پریکړې د نورو لوبڅارانو په پرتله غوره وبللې او نوموړي ته یې په دې اړه یو سند هم ورکړ.
