د هرات ښاري څارنوالۍ رییس ګل احمد رامش سلام وطندار ته وویل، چې دغه بندي عبدالقیوم نومیږي او د خپل ورور د قتل په تور په شینډنډ ولسوالۍ کې په ۱۲ کاله بند محکوم شوی و.
ده زیاته کړه، چې نوموړي ۲ کاله د بند موده تېره کړې وه.
د رامش پر خبره عبدالقیوم دوې ورځې وړاندې د زندان له امنیتي مسولین نه غوښتنه کړې وه، چې دی د زندانیانو څخه جلا او يواځې په یو اطاق کې بند کړي.
کله چې دی یې دغو خونې ته ولیږداوه، نو تېره ورځ یې د خپل دستمال په وسیله ځان زندۍ کړی و.
د هرات ښار څارنوالي د دې کار لامل رواني ستونزې په ګوته کوي او وايي، چې له دوو کلونو راهیسې د کورنۍ هیڅ غړی یې پوښتنې نه و راغلی او له همدې امله ورته رواني ستونزې پیدا شوې وې.
په سیمه کې د سلام وطندار خبریال هڅه وکړه، چې د زندان د مسولینو سره خبرې وکړي، خو دوی له خبرو ډډه وکړه.
دا په داسې حال کې ده، چې د تېر کال په اوږدو کې څو ځلې د هرات ولایت زندانیانو د دوی دوسیو ته د نه پاملرنې او په عدلي او قضايي ارګانونو کې د فساد شتوالي له امله اعتصاب کړی و او خپلې خولې یې ګنډلې وې.
دمګړۍ د هرات ولایت په زندان کې ۲۰۰ ښځینه او له ۳ زرو زیات نارینه بندیان موجود دي.
