د هرات ولایت یو شمېر اوسېدونکي او کارپوهان وایي، د دغه ولایت د سیمه ییزو ادارو مسوولین د دې پر ځای چې د خلکو کارونو ته ورسیږي، خپل زیاتره وخت په تشریفاتي او سمبولیکو غونډو کې تېروي.
د دې ولایت اوسېدونکي وايي، چې هره ورځ په دغه ولایت کې د سیمه ییزو او شخصي ادارو له خوا تشریفاتي غونډې جوړیږي او په دې وروستیو کلنو کې د سمبولیکو غونډو جوړل یو فرهنګ ګرځېدلی دی.
د اقتصادي او سیاسي چارو ځینې شنونکي د سمبولیکو غونډو جوړول بیا د دولتي او خصوصي ادارو د مسوولینو "ساعت تېری" بولي.
د سیاسي چارو کارپوه محمد رفیق شهیر سلام وطندار سره په خبرو کې وویل، هغه مسوولین چې خپل اداري کارونه پرېږدي، یوازې د ځان ښودنې له پاره په دغه ډول غونډو کې ګدون کوي.
دی وايي، دا کار د دې لامل کېږي، چې په ادارو کې کارونه له خنډ او ځند سره مخ شي.
د اقتصادي چارو شنونکی یعقوب مشعوف وايي، چې د تشریفاتي غونډو جوړول هېواد او وطنوالو ته کومه ګټه نه لري، ښه به دا وي، چې چارواکي خپل مسوولیتونه ښه وپېژني.
دغه راز، د هرات د ولایتي شورا غړې سمیه رامش هم په تشریفاتي غونډو کې د دولتي ادارو د مسوولینو ګډون پر مخنیوي ټینګار کوي او وایي، چې په ورځ کې لسګونه هرات ښاریان د دولتي ادارو تړلو دروازو تر شاه په تمه دریږي، خو د دغه ولایت د ادارو مسوولین خپل وخت په تشریفاتي غونډو کې تېروي.
د هرات پوهنتون د ټولنپېژندنې استاد علي احمد کاوه وایي، چې د غونډو جوړول د دولتي او شخصي ادارو د لاسته راوړ نو ښودل دي، خو اوس دغه کار ادارو ته پر یو عمده هدف بدل شوی.
خو د هرات د والي ویاند غلام جیلاني فرهاد بیا وایي، چې په غونډو کې ګډون کول او د خلکو نظرونو او ستونزو اورېدول د سمه ییزو ادارو د مسوولینو له دندو دي.
