د نیمروز زنداني ښځې ادعا کوي، چې د دغه ولایت د زندان مسوولینو له خوا له وهل ټکولو وروسته پرې جنسي تېري هم شوي دي.
د یاد ولایت له زندانه ښځو سلام وطندار ته د ټېلفون پر کرښه ویلي، چې له تېرو څو ورځو راهیسې په زندان کې د پولیسو له لوري د زیات وهلو ټکولو وروسته اوس يې اعتصاب هم کړی دی.
بي بي نګاره، چې په یاد زندان کې يې درې کلونه تېر کړي وايي، په زندان کې د پولیسو له لوري وهل او ټکول شوې ده.
د معلوماتو له مخې په دغه زندان کې ۱۱ ښځينه او ۳ ماشومان زنداني دي.
له بل لوري بي بي حسینه، چې د خپل مېړه په وژنې زنداني شوې ده وايي، د زندان مسوولینو له لوري وهل ټکول کيږي او هم سپکې او سپورې ورته ویل کيږي.
که څه هم پر دغه د محکمې له لوري د قید حکم شوی، خو د زندان مسوولین په غېر قانوني کړنو تورنوي.
د هغې پر خبره په زندان کې د مسوولینو له لوري پر ځينو ښځو جنسي تېری هم شوی دی.
بي بي حسینې زیاته کړه، د قانون له لوري بندیانو ته، چې کوم حقوق ورکول شوي دوی ته نه رسيږي.
دوی خبرداری ورکوي، که يې حکومت غوښتنې و نه مني او د دوی ستونزو ته جدي پاملرنه و نه کړي، نو ځانونه به و وژي.
له بل لوري د ۵۰۵ بُست زون قوماندان جنرال عصمت الله دولتزايي د دغو ادعاو په ردولو سره وايي، چې دوی له زندانه هر وخت څارنه کوي او تر اوسه دوی ته پر ښځينه زندانیانو د زور زیاتي راپور نه دی رسېدلی.
نوموړي زیاته کړه، که ښځينه زندانیانې په دې اړه ستونزې لري او یا هم په دې اړه کره اسناد لري، نو د نيمروز له استیناف څارنوالۍ سره دې شریکې کړي.
نیمروز هغه ولایت دی، چې د وګړیو شمیر یې د نورو ولایتونو په پرتله کمه ده، خو دلته برخلاف د ښځو پر وړاندې تاوتریخوالی هغه څه دي، چې زیات کورنۍ ترې ځوریږي.
