د ننګرهار امنیتي مسوولان وايي د دې ولایت په یوشمېر ولسوالیو کې لوړ امنیتي ګواښونه دي او ښايي پهکې ټاکنې ونهشي.
د ننګرهار امنیې قومندان غلامسنايي ستانکزي سلاموطندار ته وویل، که څه هم امنیتي ځواکونه ژمن دي چې د ټاکنیزو مرکزونو امنیت ونیسي، خو ځینې هغه یې له لوړ امنیتي ګواښ سره مخ دي.
د نوموړي په وینا، شېرزاد، حصارک، اچین، نازیان او خوږیاڼي ولسوالیو کې لوړ او په مومندره، غنيخېلو او بټيکوټ ولسوالیو کې متوسط امنیتي ګواښونه دي چې د ټاکنو پر پروسې اغېز کوي.
په همدې حال کې د ننګرهار د ټاکنو خپلواک کمېسیون ولایتي دفتر د مالوماتو له مخې، دې ولایت کې په ټاکنو کې د ګډون لهپاره په ۳۹۴ مرکزونو کې نوملیکنه شوې ده.
د یاد دفتر رییس احمدداوود صدیقزاده وايي، د دې ولایت په حصارک او شېرزاد ولسوالیو په ګډون، یوشمېر نورو سیمو کې ځینې ټاکنیز مرکزونه له لوړ امنیتي ګواښ سره مخ دي چې د ځمکې له لارې ورته ټاکنیز توکي وړلی نهشو.
بلخوا د ننګرهار اوسېدونکي سبحانالله او حمیدالله وايي، د اندېښنو او احتمالي بریدونو سره سره به په ټاکنو کې ګډون کوي.
د ټاکنو خپلواک کمېسیون د مالوماتو له مخې، ننګرهار کې د ولسي جرګې ټاکنو لهپاره ۸۱۸ زره کسانو نوملیکنه کړې چې ۲۶۶ زره یې ښځینه دي.
له ننګرهاره ولسي جرګې ته یوشمېر نوماندان، په ځانګړي ډول ښځینه هغه وايي چې د امنیتي ستونزو له کبله په ډاډه زړه کمپاین کولی نهشي.
دا په داسې حال کې ده چې څه موده وړاندې د دې ولایت په کامې ولسوالۍ کې د نوماند ناصرخان مومند پر ټاکنیز دفتر ځانمرګی برید وشو چې ۱۴ کسان پهکې ووژل شول او ۴۱ نور ټپیان شول.
