د ننګرهار د والي ویاند عطاالله خوږياڼی وايي، د دغه ولایت په ښېوې ولسوالي کې د جنازې مراسمو پر مهال شوي ځانمرګي برید کې د ولايتي شورا د غړي لالاخان ملکزي په ګډون ۱۵ کسان وژل شوي او د هغه د پلار او د ولسي جرګې د غړي ملک قیس نوراغا په ګډون ۵۶ نور ټپیان دي.
عطاالله خوږیاڼی وايي، ځانمرګی برید د دغې ولسوالي لپاره د سیمهییزو پولیسو د مخکیني قوماندان شیخ اکرم د جنازې تر لمانځه څو شېبې دمخه شوی دی.
په همدې حال کې د ننګرهار د عامې روغتیا ریاست ویاند ظاهر عادل وايي، تر اوسه د جلالاباد حوزوي روغتون ته ۱۲ جسدونه او ۵۶ ټپیان وروړل شوي دي.
په سیمه کې عیني شاهدانو ویلي، ځانمرګی برید داسې مهال وشو چې د شیخ اکرم جنازې ته ګڼشمېر خلک ور ټول وو.
د معلوماتو له مخې، د شیخ اکرم جنازې ته د یادو دوو وکیلانو تر څنګ، جهادي مشر او په ولسي جرګه کې د ننګرهار یو بل استازی حضرتعلي هم ورغلی و، خو هغه ته زیان نه دی اوښتی.شیخ اکرم تېره شپه د زړه ناروغۍ له امله مړ شوی و.
تر اوسه د دغه برید مسوولیت کومې وسلهوالې ډلې نه دی منلی.
تر دې وړاندې همدا نن د کابل په دشت برچي سیمه کې یوه ۱۰۰ بستریز روغتون ته وسلهوال ننوتي او نښته اوس هم روانه ده.
