سلګونو کوچیانو نن د میدان وردګ ولایت په مرکز میدان ښار کې د خپل حق غوښتلو، د نامسووله وسلهوالو او غاصبانو پر وړاندې پراخ لاریون وکړ.
لاریونوالو چې د یوه ساعت لپاره یې د کابلـکندهار لویه لاره هم تړلې وه، د دغه ولایت د بهسودو په دوو ولسوالیو او دایمیرداد کې د نامسووله وسلهوالو له لوري د دوی د مېنو، کورونو او څړځایونو د غصب او ظلمونو پر وړاندې اعتراض وکړ.
یوه لاریونوال او د کوچیانو قومي مشر حاجي علمګل وايي چې هزاره قوم د نامسووله وسلهوالو پر مټ د دوی مېنې او کورونه نیولي او د ورتګ اجازه نه ورکوي.
نوموړي پر حکومت غږ وکړ چې په میدان وردګ ولایت کې د کوچیانو او ځایي خلکو ترمنځ د راپورته شوې شخړه حل کړي، کنه ستر ناورین به جوړ شي.
حاجي علمګل وايي چې د نامسووله وسلهوالو قوماندان عليپور د دوی پر جایدادونو او څړځایونو خېټه اچولې او دولت یې هم غږ نه اوري.
یوه بل لاریونوال او د کوچیانو قومي مشر حاجي خالو هم وايي چې له تېرو څو کلونو راهیسې په میدان وردګ ولایت کې د نامسووله وسلهوالو له لوري پر کوچیانو ظلم کېږي او خپلو اصلي مېنو ته نه پرېښودل کېږي او په وینا یې، نننی لاریون یې هم د یادې ستونزې د حل لپاره کړی دی.
دغه قومي مشر په ولسي جرګه کې د کابل د خلکو استازی غلامحسین ناصري، د میدان وردګ ولایت استازی مهدي راسخ او د نامسووله وسلهوالو قوماندان عليپور تورنوي چې د کوچیانو په مرګ پسې راوتلي او د له منځه وړلو هڅه یې کوي.
قومي مشر علمګل وايي، هزاره قوم د کوچیانو پر جایدادونو، کورونو او څړځایونو تېری کړی، د دوی څاروي مړه کړي، کورونه یې سوځولي او لا هم پر دې موضوع ورسره شخړه کوي.
که څه هم هڅه مو وکړه چې په دې اړه د میدان وردګ ولایت د ولایتي ادارې نظر هم واخلو، خو هغوی له څه ویلو ډډه وکړه.
