.jpg)
د هرات د برېښنا شرکت رییس وحیدکامران نن پهدې ولایت کې خبري غونډې ته وویل چې تېره شپه ۱۱ نیمې بجې د ترکمنستان وارداتي برېښنا تړون له افغانستان سره پای ته ورسېد او د تړون نه غځېدو له امله ترکمنستان خپله برېښنا پرې کړه.
د ده په وینا، ترکمنستان په نوي تړون کې د برېښنا بیه کې د سل سلنې لوړوالي غوښتنه کړېده. دوی ویلي، پخوا هر واټ برېښنا دوه سېنټه امریکايي ډالره وه؛ اوس ۴ سېنټه غواړي.
ښاغلي کامراني زیاته کړه سره لهدې چې افغان پلاوي له یوې میاشتې راهیسې د برېښنا بیې ټیټولو لهپاره چنې وهي؛ خو تر دامهاله د وارداتي برېښنا تړون نهدی نوی شوی.
د هرات برېښنا رییس په خبره، د هرات او فاریاب ولایتونو ځېنو سیمو د ترکمنستان له وارداتي برېښنا کار اخیست.
خو د ولسي جرګې غړې ناهید فرید سلام وطندار ته وویل چې د تړونونو پر بنسټ ترکمنستان شاوخوا درې کاله وړاندې د خپلې برېښنا بیه ۴ سېنټو ته لوړه کړېوه او د برېښنا شرکت يې پیسې هم له خلکو اخیستې دي.
.jpg)
د اغلې فرید په وینا، د برېښنا پرېکېدو ستونزه د بیې له لوړوالي سره هېڅ تړاو نهلري او له خلکو نه د اخیستل شویو پیسو په اړه باید څېړنه وشي.
په ورته وخت کې د هرات ولایتي شورا رییس کامران عليزي د ترکمنستان وارداتي برېښنا پرېکیدو لامل د برېښنا شرکت مسوولانو ناکامي بولي او وايي چې دوی باید د برېښنا له پرېکېدو مخکې له ترکمنستان سره هوکړې ته رسېدلي وی.
په ورته وخت کې د هرات ځايي اداره د برېښنا شرکت له عمومي رییسه غواړي چې ژر تر ژره له ترکمنستان هېواد اړوندو چارواکیو سره هوکړې ته ورسېږي او دې ستونزې ته دې ژر جدي حللاره وګوري.
