په افغانستان کې د ملګرو ملتونو مرستندویه دفتر یا یوناما ویلي چې د تېر کال د ورته مودې په پرتله د طالبانو او افغان ځواکونو د عملیاتو په پایله کې د روان کال په اپریل مياشت کې د ملکيانو د مرګژوبلې کچه لوړه شوې ده.
یوناما په یوه تازه راپور کې ويلي چې د روان ميلادي کال اپرېل مياشت کې د طالبانو له لوري ۲۰۸ ملکیانو ته مرګژوبله اوښتې چې د تېر کال همدې مياشتې په پرتله ۲۵ سلنه ډېروالی ښيي.
یوناما نن په يوه خپره کړې اعلاميه کې د داعش ډلې له لوري د خونړیو بریدونو پر ترسره کولو هم جدي اندېښنه ښودلې ده.
يوناما ويلي چې افغان ځواکونو هم ۱۷۲ ملکیانو ته مرګژوبله اړولې چې د تېر کال همدې مياشتې په پرتله ۳۸سلنه او د روان کال د مارچ مياشتې په پرتله ۳۷ سلنه ډېروالی ښيي.
سرچینه وایي، د دې اړتیا ده چې ژر تر ژره بین الافغاني خبرې پيل شي ځکه د ملکي وګړيو د مرګژوبلې اوسنۍ کچه د جدي اندېښنې وړ ده.
د یوناما مشرې دیبرا لاینز ویلي ښکېل لوري دې ژر تر ژره له کرکجنو خبرو او څرګندونو ډډه وکړي او پر ځای یې دې د سولې او بین الافغاني خبرو لپاره اقدامات وکړي.
د نوموړې په وینا په افغانستان کې باید د ملکي وګړو مرګ ژوبله ودرول شي او ټول اړخونه دې د سولې او اوربند لار خپله کړي.
ملګرو ملتونو ویلي چې په ملکي خلکو او د روغتيايي مرکزونو په ګډون ملکي اهدافو باندې قصدي بریدونه جنګي جنايت دی.
