د کورنیو چارو وزارت مسوولین وايي، په وروستۍ یوه میاشت کې په کابل ښار کې جنایي جرمونه زیات شوي دي.
د دې وزارت ویاند صدیق صدیقي سلام وطندار سره په مرکه کې وویل، هر ورځ پولیس له ۵ تر ۱۰ تنو په بېلابېلو جنايي جرمونو نیسي.
د صدیقي په خبره، پولیس له طالبانو سره د جګړې په لومړۍ کرښه کې په جګړه دي او له جنايي جرمونو سره د مبارزې په برخه کې لاس رسی کم شوی دی.
د دې وزارت ویاند وايي، د امنیتي ګواښونو زیاتېدل د جنايي جرمونو د زیاتېدو بل لامل دی.
د کورنیو چارو وزارت ویاند له خلکو غواړي، چې د مجرمانو په پېژندلو کې له پولیسو سره مرسته وکړي.
د نظامي چارو پوه جنرال عتیق الله امرخېل وايي، دقیق نظارت نشتوالی، له سرتېرو سره د مسوولینو دوه ګونی چلند د جنايي جرمونو د زیاتېدو اصلي عامل دی.
نوموړي سلام وطندار ته وویل، د کابل ښار د پولیسو سرتېري د بېلابېلو خلکو له خوا ګومارل شوي؛ دوی یوازې معاش خواره دي او خپلو دندو ته پام نه کوي.
د دې شنونکي په باور تر هغې چې د کابل ښار امنیتي مسوولین خپل مسوولیتونه په سم ډول درک نه کړي، د ښار په امنیتي حالت کې ښه والۍ نه راځي.
د نظامي چارو بل شنونکی جنرال زلمی وردګ وايي، د امنیتي بنسټونو ترمنځ نه همغږي او مداخله د دې لامل شوي، چې په ښار کې جنايي پېښې زیاتې شي.
د وردګ په خبره زیات شمېر امنیتي مسوولین د مصلحتونو په اساس ګومارل کېږي، چې په دندو کې بیا پاتې راځي.
دا په داسې حال کې ده، چې زیات شمېر ښاریان په ښار کې د خپل سره وسله والو له موجودیت نه شکایت کوي او وايي، چې امنیتي مسوولینو د ناقانونه وسلو د ټولو په برخه کې هېڅ اقدام نه دی کړی.
