د ملا محمد رسول پر مشرۍ له طالبانو جلا شوې ډله د هلمند مرکز له لښکرګاه ښاره بهر په تریخ ناور سیمه کې نن (شنبه) یوې غونډې ته وویل، چې پاکستان د افغانستان دوښمن دی او هېڅکله په افغانستان کې امن نه غواړي.
غونډې ته په هلمند کې د دې ډلې یو مشر مولوی عبدالغني وویل، چې دوی به هېڅکله د پاکستان، ایران او انګلستان هېوادونو د ګټو قرباني نه شي.
د طالبانو دې ځایي مشر مولوي عبدالغني وویل، پاکستان هره ورځ د افغانستان پرضد جګړه کوي او د ده پر وینا، که په افغانستان کې هر ډول دولت وي؛ پاکستان یې په کرار نه پریږدي.
ده زیاته کړه، که مشران یې له افغان دولت سره سوله وکړي؛ دوی به یې هرومرو ملاتړ وکړي.
مولوی غني وویل، چې د بهرنیانو تر وتلو به په افغانستان کې جګړې ته دوام ورکړي.
په غونډه کې د دې ډلې نظامي قوماندان سېلاب وویل، چې پاکستان اوسمهال په ډېورنډ کرښه جګړه کوي، دوی به دې هېواد او د دوی پلو ته اجازه ورنه کړي، چې په افغانستان کې ویجاړۍ را منځته کړي.
د ملا عمر د وژل کېدو خبر له اعلان وروسته طالبان پر جلا ډلو وېشل شوي، اوسمهال د یوې ډلې مشري ملا هیبت الله او د بلې یې ملا محمد رسول کوي، چې په خپلو کې له یو بل سره یې درنې جګړې کړي؛ د راپورنو پر بنسټ په دې جګړو کې سلګونه کسان وژل شوي دي.
