ولسمشرۍ ماڼۍ د مخابراتو او معلوماتي ټکنالوژۍ پخواني وزیر عبدالرزاق وحیدي دنده په ځینو قراردادونو کې د لاس وهنې او مالي فساد په تور دنده ځنډولې ده.
خو د مخابراتو او معلوماتي ټکنالوژۍ پخوانی وزیر عبدالرزاق وحیدي وايي، چې د سیاسي دسیسې له کبله یې دنده ځنډول شوې ده.
وحیدي په یوې خبري غونډه کې وویل، د یوې میاشتې په تېریدو سره لا هم د دندې ځنډېډو حکم نه دی ور رسېدلی او د خپلې دوسیې په اړه يې له څېړونکو بنسټونو سره اړیکه نیولې؛ خو څوک ځواب نه ورکوي.
د وحیدي پر وینا، د قانون پر بنسټ له کرېډت کارتونو د مالیې ټولول د مالیې وزارت او اترا ادارې دندې دي او د مخابراتو وزارت په دې اړه هېڅ قانوني مسوولیت نه لري.
وحیدي زیاته کړه، له اداري فساد سره د مبارزې د څارنې ګډې خپلواکې کمېټې په مخابراتو وزارت کې د فساد په اړه هېڅ راپورنه دی خپور کړی او هغه څه يې هم، چې خپاره کړي دي؛ د "یو بې سر او پای خبرپاڼې" په حد کې دی.
نوموړي وویل، که په دې هېواد کې قانون واکمني کولی، اوس باید د ده پر ځای د نورو کسانو دندې ځنډول شوي وی، خو نوموړي په دې اړه د خاصو کسانو نومونه وانه خیستل.
وحیدي د څېړونکي پلاوي د موندنو د خپرولو غوښتونکی دی.
خو له بل لوري په ارګ کې یوې باوري سرچینې د نوم نه خپرولو په شرط وویل، چې وحیدي دندې ځنډېډو لامل د ټیلیفون له کرېډت کارتونو د راټولو شویو عوایدو سیستم په اړه د پلټنې پلاوي سره نه همکاري ده.
