د ننګرهار د والي ویاند عطاالله خوږیاڼي رسنیو ته وویل، د دې ولایت مرکز جلالاباد ښار په درېیمه ناحیه کې د ماشومانو ساتنې سویدنۍ موسېسې پر ساحوي دفتر برید کې ۵ تنه وژل شوي دي.
عطاالله خوږیاڼی وايي، په وژل شویو کسانو کې ۲ تنه د دغې موسېسې ساتونکي، ۱ تن یې ولسي وګړی او د ۲ نورو جسدونه لا تشخیص شوي نه دي.
ښاغلی خویاڼي وویل، په دې برید کې ۲۶ تنه ټپیان شوي دي چې ۴ هغه یې امنیتي سرتېري دي او زیاتوي، د ټپیانو له ډلې ۶ تنه یې د ټپونو لهامله بستر شوي او پاتې یې خپلو کورنو ته رخصت شوي دي.
دی وايي، پر دغه دفتر ۴ بریدګرو حمله کړې وه، چې یو یې ځان ته په دروازه کې چاودنه ورکړې وه او ۳ نور یې د امنیتي ځواکونو لهخوا ووژل شول.
دغه راز امنیتي ځواکونو د سیف د چلډرن موسېسې د ۱۲ مېرمنو په ګډون ۴۶ کارکوونکي له بریده ژغورلي دي.
بل خوا د ننګرهار د عامې روغتیا ریاست ویاند انعامالله میاخېل سلاموطندار ته وویل، له یادې پېښې د جلال اباد حوزوي روغتون ته یو مړی او ۲۴ ټپيان ور وړل شوي، چې ځینې یې تر لومړنۍ درملنې وروسته کورونو ته ورستانه شوي دي.
د پېښې شاهدانو ویلي، د ماشوم ساتنې موسېسې یا سیف د چلډرن یوشمېر موټر چې د ماشومانو بکسې په کې بار وې؛ د وتلو په حال کې وو، چې چاودنه پرې وشوه.
اخوا سیف د چلډرن موسېسې د یوې اعلامیې په خپرولو سره ویلي، چې د لنډ وخت لهپاره یې په افغانستان کې خپل دفترونه وتړل.
طالبانو په دغه برید کې لاس لرل رد کړي؛ خو ټویټر کې د ترورمانیټور په نوم یوې پاڼې لیکلي، جلالاباد کې نننی برید داعش وسلهوالې ډلې کړی دی.
دغې موسېسې تراوسه په افغانستان کې له ۱ اعشاریه ۴ میلیونه ماشومانو سره په بېلابېلو برخو کې مرسته کړې ده.
لومړني معلومات:
برید نن سهار شاوخوا نهه بجې د ننګرهار ولایت په مرکز جلال اباد ښار کې د ماشوم ساتنې پر موسېسې پیل شوی، چې په ترڅ کې یې ۱۲ کسان ټپيان شوي دي.
د ننګرهار د والي ویاند عطاالله خوږیاڼي سلاموطندار ته وویل، یو ځانمرګی بریدګر د جلال اباد ښار په درېیمه ناحیه کې د ماشومانو ساتنې یا سیف د چلډرن موسېسې دفتر مخې ته ځان الوزولی او وروسته نور بریدګر یادې موسېسې ته ننوتلي او ډزې یې پیل کړي.
ښاغلی خوږیاڼی زیاتوي، په ټپیانو کې عام خلک او سیف د چلډرن موسېسې کارکوونکي شته، چې نهه ټپيان له لومړنۍ درملنې وروسته رخصت شوي او دوه بستر دي.
هغه وايي، ښایي د دې پېښې مرګ ژوبلې په شمېرو کې بدلون راشي.
په سیمه کې اوس هم ډزې اورېدل کېږي او امنیتي ځواکونو سیمه کلابند کړې ده.
