.jpg)
ښوونه او روزنه د ټولنې بنسټ تشکیلوي. له یوې نیمې لسیزې راهیسې حکومت هڅه کړې هېوادوالو ته د ښوونې او روزنې زمینه برابره کړي. له دغو هڅو سره لا هم لېریو پرتو سیمو کې زیاتره زدهکوونکي د لیک لوست زدهکړو امکانات نه لري او په ځېنو نورو سیمو کې بیا د ښار په پرتله زښت کم امکانات ورته برابر شوي دي.
۲۲ کلنه بصیره د هرات لېرې پرتې کشک رباط سنګي ولسوالۍ استوګنه ده. دغه زدهکوونکې مېرمن شکایت کوي چې په لېرې پرتو سیمو کې د مسلکي زدهکړو زمینه برابره شوې نه ده. نوموړې وايي، په ولسوالیو کې زیاتره خلک اقتصادي ستونزې لري او زدهکوونکي دا توان نه لري ښارونو ته ولاړ شي او د کانکور ازموینې چمتووالي درسونه ووايي؛ له امله یې زیاتره له دولسم ټولګي وروسته زدهکړې خوشې کوي.
بصیره وايي، له نېکهمرغه د افغانستان مدني ټولنو د بنسټونو شبکې موسېسې لهخوا په دغې ولسوالۍ کې د زدهکوونکیو لهپاره د کانکور ازموینې چمتووالي کورسونه شروع شوي دي او ۶ میاشتې کېږي دا هم په یادو کورسونو کې زدهکړې کوي.
دغه مېرمن د دې ترڅنګ چې خپله د کانکور چمتووالي درسونه وايي، په کور او مالت کې د کورنۍ غړیو او ګاونډیانو ته هم دغه درسونه ورښيي.
دا یوازې بصیره نه ده، بلکې د هرات په دغې لېرې پرتې او نسبتا ناامنه ولسوالۍ کې ۱۲۰ هلکا او نجونې د کانکور امادهګي وايي او دغه زدهکړې بیا نورو ته رسوي.
انیسه ګل نوري، د دې کورس بله هغه زدهکوونکې ده چې د کانکور ازموینې چمتووالي درسونه په زښته لېوالتیا وايي او ترڅنګ یې پښتو او انګلیسي ژبې هم زدهکړي دي.
دغه پېغله مېرمن په ټولګي کې د استاد درسي مرستیاله هم ده او په کور کلي کې خپلوانو او د کورنۍ غړیو ته د زدهکړو حلقه برابره کړې ده.
محمدکاظم د کشک رباط سنګي یو بل استوګن دی چې سږکال له دولسم ټولګي فارغ شوی. دی اوسمهال د کانکور ازموینې لهپاره د چمتووالي درسونه وايي. هغه په ساینسي مضمونو کې تکړه دی او په دې برخه کې د نورو ملګرو د ستونزو حلولو ترڅنګ په سیمه کې ګاونډیانو او خپلوانو ته زدهکړې ورکوي.
.jpg)
د دغه ښوونیز مرکز دوه استادان انجینیر فېروز او غلام جیلاني وايي، زدهکوونکي یې د کمپوټر، ساینسي مضمونو او کانکور امادګۍ په درسونو کې ښې وړتیاوې ښودلي او په ټوله معنا یې زدهکوونکي د کانکور ازموینې ته چمتوو دي.
دغه استادان وايي، زدهکوونکي یې د دې ترڅنګ چې دلته زدهکړې کوي بلکې په خپلو سیمو کې هم نورو زدهکوونکیو ته دا درسونه رسوي.
د افغانستان مدني ټولنې شبکې غړی او د دغو کورسونو څارونکی حمید رضا ظاهر سلاموطندار سره په خبرو کې وویل، کورنۍ اقتصادي ستونزې لري، نه شي کولی اولادونه د زدهکړو لهپاره ښارونو ته ولېږي.
دی وايي، د دې ټولنې لهخوا برابر شوي دا کورسونه د زدهکوونکي لهپاره زښت مهم دي او ښه پایله به ورکړي.
د افغانستان مدني ټولنو د بنسټونو شبکې رییس جواد عمید وايي، په پلان کې لري چې په لېریو پرتو سیمو کې د محرومو زدهکوونکیو لهپاره دغه ډول ښوونیز پروګرامونه برابر کړي ترڅو ځوان پاړکی لوړو زدهکړو ته لاره پیداکړي.
د افغانستان مدني ټولنو د بنسټونو شبکې موسېسه په پلان کې لري چې په راتلونکي کال کې د دې ولسوالۍ د تورغونډۍ سیمې خلکو ته د کانکور ازموینې چمتووالي او نورو اړوندو کورسونو زمینه برابره کړي.
