د ټرانسپورټ، ټولګټو چارو، د سوداګرۍ او صنایعو او مالیې وزارتونو د کابل د ټرافیکو ریاست سره د لوړ تناژ لرونکیو موټرو د کنټرول او پر باروړونکیو موټرو د پلېټونو لګولو په موخه ګډه غونډه جوړه کړه.
د ټولګټو چارو وزیر یما یاري پهدې غونډې کې وویل، اوس د هېواد په کچه ۲۵ سلنه لویې لارې تخریب شوي چې بیارغونه یې میلیونونو ډالرو ته اړتیا لري.
د نوموړي په وینا، دوی له نورو سکتوري ادارو سره په همغږۍ د لوړ تناژ لرونکیو موټرو د وزن کنټرول لپاره طرحې جوړې کړې دي.
له ټرانسپورټي شرکتونو د ژمنو اخیستل، د اضافي بارونو نیول، په ټولو تلو کې د کمرو لګول او د له مرکز یې کنټرول، پر لویو لارو د ګرځنده تګراتګ ډېروالی، د بېلابېلو ټرانسپورټي شرکتونو جریمه او د جوازونو لغوه کول او د کنټرول دروازو جوړول په یادو طرحو کې شامل دي.
یما یاري وايي، د سړکونو تخریبول له هېواد او راتلونکي نسل سره ملي خیانت دی.
په همدې حال کې د ټرانسپورټ وزیر حمید طهماسي پهدې غونډې کې د لوړ تناژ لرونکیو موټرو له چلوونکیو غواړي چې د موټرو پلېټونه یې پر خپلو ځانګړو ځایونو ولګوي.
نوموړی د حکومت د عوایدو بېځایه تلو د مخنیوي لپاره مهم بولي.
بلهخوا د مالیې وزیر همایون قیومي وايي، لارې او سړکونه د ټولنې بنسټیزې اړتیاوې دي او موټرچلوونکي یې باید ساتلو ته جدي پام وکړي.
قیومي خبرداری ورکوي، هغه کسان او د باربري اتحادیې چې د مقررو خلاف عمل کوي، نه یوازې جریمه او توکي به یې ضبط شي، بلکې په ګمرکونو کې به هم د خپلو ټرانسپورټي چارو د ترسره کولو اجازه ور نهکړل شي.
