په سلګونه د فاریاب او بغلان ولایت اوسېدونکي د افغان امنيتي ځواکونو په ملاتړ د طالبانو پر ضد وسله وال پاڅون کړی.
د کندوز ولایت له سقوط څخه وروسته د فاریاب او بغلان ولايتونو په هکله د طالبانو تبلیغات د خلکو اندېښنې را پارولي او اوس د ياد ولایت اوسېدونکي د وسله والو طالبانو پر ضد وسله وال پاڅون ته مجبور شوي.
دغه اعتراض کوونکي د افغان امنيتي ځواکونو له زړورتیا د ستاينې ترڅنګ وايي، چې دوی چمتو دي، څو د وسله والو طالبانو پر ضد د افغان امنيتي ځواکونو سره اوږه په اوږه و جنګيږي.
په سلګونه د مدني ټولنو فعالان، قومي مشران، سياسي ګوندونه، جهادي قومندانان، د ولايتي شوراګانو غړي او د فاریاب ځوانان د مېمنې ښار په سرکونو راوتلي و او د طالبانو پر ضد يې شعارونه ورکول.
سلام وطندار ته د اعتراض کوونکو څخه په رارسېدلو انځورونو کې ليدل کيږي، چې د دغو پاڅون کوونکو سره درنې او سپکې وسلې هم شته.
اعتراض کوونکي، د پاکستان حکومت په افغانستان کې له ترهګريزو فعاليتونو پر ملاتړ تورن کړ او په جدي توګه يې غوښتنه وکړه، چې اسلام اباد باید د افغانستان په هکله له خپلو ناوړو سياستونو لاس واخلي.
دوی وسله والو طالبانو ته خبرداری ورکړ، چې په فاریاب کې به د دوی له پاره هیڅ ځای نه وي.
داسې ویل کيږي، چې د دغه ولایت په ځينو سيمو کې د افغان امنيتي ځواکونو او وسله والو طالبانو ترمنځ نښته روانه ده.
د فاریاب امنيتي چارواکي وايي، چې دوی د طالبانو هر ډول بريدونو ته چمتو والی لري.
په بغلان کې د دویم ځل له پاره د خلکو وسله وال پاڅون
د بغلان ولایت ځينو اوسېدونکو څو ورځې وړاندې هم د وسله والو طالبانو پر ضد وسله وال پاڅون کړی و.
همدارنګه نن یکشنبه (اکټوبر ۴مه) په سلګونه ولسي وګړي د طالبانو پر ضد وسله وال پاڅون وکړ.
پخوانی جهادي قومندان سېد حشمت، چې اوسمهال ۳۰۰ د وسله پاڅون وګړو رهبري په غاړه لري سلام وطندار ته وویل، چې د افغان امنيتي ځواکونو ټينګ ملاتړ کوي او هيڅکله به هم وسله والو طالبانو ته اجازه ور نه کړي.
له دې وړاندې هم له یاد ولایت څخه ۳۰۰۰ تنو د طالبانو پر ضد وسله وال پاڅون کړی و.
هغه کسان، چې د دغو پاڅونونو رهبري کوي له دولت څخه غواړي، چې له دوی سره د مهماتو په برخه کې لازمې مرستې وکړي.
اوسمهال د پلخمري په زیاتو سيمو او مرکزي بغلان کې عام وګړي د افغان امنيتي ځواکونو سره يوځای له هېواد څخه ساتنه کوي.
