د غور ولایت یو شمېر اوسېدونکي وايي، د نادولتي موسېسو فعالیتونه یوازې د دې ولایت مرکز فیروز کوه پورې محدود دي او نورو سیمو کې د پروژو عملي کولو ته لېواله نه دي.
د دې ولایت دوو تنو اوسېدونکو سلطان محمد او محمد نبي سلام وطندار سره په خبرو کې وویل، ولایتي اداره باید د موسېسو له مسوولو کسانو سره په دې اړه خبرې وکړي او نادولتي موسېسې کلیو ته د کار له پاره وهڅوي.
دغو اوسېدونکو وویل، په کلیو کې دومره ناامني نه شته چې د موسېسو د کار مخنیوی وکړي.
د غور د والي ویاند عبدالحی خطیبي د خلکو خبرې مني او وايي، د بهرنیو موسېسو د پالیسۍ له مخې هېڅوک د هغوی په چارو کې لاس وهنه نه شي کولی.
دی وايي، څو ځلې یې له دغو موسېسو غوښتنه کړې، چې خپلې چارې ولسوالیو ته وغځوي.
د خطیبي پروینا، نادولتي موسېسې د چارو محدوولو په برخه کې ناامني یوازېنۍ دلیل بولي؛ خو په ولسوالیو کې ناامني هېڅکله هم نادولتي موسېسې نه ګواښي.
خو د افغانستان د همغږۍ او پراختیايي موسېسې رییس جمال یعقوبي وايي، دغه موسېسې د حرفې، څښاک اوبوته لاس رسي او د بېځایه شویو د حقوقي خوندیتوب په برخه کې کار کوي.
نوموړی د چارو محدودېدو په اړه وايي، د نادولتي موسېسو بودیجه د پخوا په پرتله راکمه شوې او د غور مرکز پورې د چارو محدودېدل يې هم په ولسوالیو کې ناامنۍ ده او حکومت نه شي کولی د موسېسو د کارکوونکو امنیت خوندي کړي.
