د غزني امنیه قوماندانۍ: د اندړو ولسوالۍ پولیس په فساد کې ډوب دي

د غزني ولایت امنیه قوماندان جنرال امین الله امرخېل د اندړو ولسوالۍ د پولیسو د ضعیت د څېړلو له پاره هلته ورغلی و.

امرخېل په دې ولسوالۍ کې د پولیسو په لیکو کې د پراخ فساد موجودیت تایید کړ او د دې ولسوالۍ د راتلونکي په اړه یې اندېښنه وښوده.

نوموړي وویل، چې د اندړو ولسوالۍ پولیس له نظامي تجهیزاتو او وسایطو څخه بې رحمانه او نامسووله ډول استفاده کوي او دغه چاره د جدي ستونزو لامل شوې ده.

د ده پر خبره، په دې لسوالۍ کې له سلو میلو زیاتې وسلې ورکې شوي دي او څو عرادې نظامي موټرونه هم ویجاړ شوي دي.

امرخېل وايي، چې د اندړو پولیس هره شپه، ده ته راپور ورکوي، چې له ۱۰ تر ۲۰ زرو مرمۍ یې مصرف کړي دي.

ده وویل، که غزني ولایت ته د مرمیو جوړولو فابریکه هم راوړل شي بیا به هم د اندړو ولسوالۍ د پولیسو د مرمیو مصرف پوره نه کړي.

جنرال امر خېل وویل، چې پولیس په دې ولسوالۍ کې مرمۍ پلوري.

نوموړي د غزني ولایت د اندړو ولسوالۍ د پولیسو په لیکو کې موجود فساد د لسو کلونو میراث وباله او زیاته یې کړه، تر هغې چې د پولیسو په لیکو کې موجود فساد جرړې وچې نه شي، د دوښمن په مقابل کې بریالیتوب سخت دی.

د غزني امنیه قوماندان جنرال امین الله امرخېل وايي، چې د اندړو ولسوالۍ پخواني قوماندانانو څخه باید د دغه فساد پوښتنه وشي، خو د سیاسیونو مداخله دوی د قانون له تعقیب څخه ژغوري.

دی وایي، چې ده له کورنیو چارو وزارت غوښتي، چې په دې ولسوالۍ کې د شته فساد د څېړنې له پاره یو پلاوی وګوماري او په فساد کې ککړ کسان دې د قانون منګولو ته وسپاري.

امرخېل وویل، درې میاشتې مخکې یې ټولو ولسي پاڅون کوونکو ته لارښوونه کړې وه، چې له سیمه ییزو پولیسو سره دې یوځای شي، خو هغوي د میلیونونو افغانیو د ګټې له پاره، چې د غلا او سړي تښتونې له لارې یې پیداکولې له پولیسو سره یوځای شوي نه دي.

د غزني والي محمدامان حمیمي سلام وطندار سره په مرکه کې وویل، چې دغو ستونزو د حل پاره به جدي پاملرنه وکړي.

حمیمي وايي، چې لومړی به پاڅون کوونکي چې ولسي خلک ځوروي په کنترول کې راولي او بیا به له نظامي وسایطو د پولیسو د بې رحمانه او نامسوولانه استفادې پوښتنه وکړي.

د اندړو ولسوالۍ د غزني ولایت نه ۲۵ کیلومتره واټن لري.

د ولسوالۍ ځېنې برخې د حکومت او ولسي پاڅون کوونکو په واک کې دي او ځېنې برخې یې د طالبانو په واک کې دي.

د اندړو ولسوالۍ مدني ټولنې فعالان په دې ولسوالۍ کې د جګړې ټولې ښکېلې خواوې په جنګي جنایتونو تورن بولي.

دوی وايي، چې د جګړې پر مهال د جګړې ښکېلې خواوې د ولسي خلکو ژوند ته پاملرنه کېږي.