د فاریاب ولايت د سوداګرۍ خونې مسوولان وايي، د هېواد شمالي ولايتونو لویو لارو کې لوړ امنیتي ګواښونه لامل شوي چې د سوداګرو زیات شمېر نفت وړونکي موټر د فاریاب اقینه بندر کې ودرول شي.
د ياد ولايت د سوداګرۍ خونې رییس عبدالمجید نیازی سلاموطندار ته وايي، د شمالي ولايتونو لویو لارو کې د طالبانو د بریدونو زیاتېدو دغه ولایت کې د سوداګرو اندېښنې راپورته کړې دي.
د نوموړي په وینا، اوس مهال شاوخوا ۴ سوه د تېلو او نور بار وړونکي موټر د فاریاب د اندخوی ولسوالۍ اقینې بندر کې درول شوي دي.
اقینې بندر کې یو له سوداګرو احمد جاوېد وايي، دغه بندر کې سوداګر د طالبانو له اخاذیو او ناامنیو په تنګ راغلي او وسلهوال طالبان د تېلو له هر موټر نه له ۳۰ زره افغانیو نیولې تر ۱۲۰ زره افغانیو پورې پیسې اخلي.
د ۲۰۹ شاهین قول اردو ویاند محمد حنیف رضايي د هېواد شمال کې د سوداګرو اندېښنې مني او وايي، د شمال زون لویو لارو کې د امنیتي ګواښونو له منځه وړلو لپاره نږدې راتلونکي کې پراخ پوځي عملیات پيلوي.
افغان سوداګرو تر دې وړاندې هم دغو لویو لارو کې د طالبانو له اخاذیو شکایت کړی دی.
تازه مورد کې تېره اوونۍ د دغو سوداګرو دوه نفت وړونکي موټر د جوزجان ـ مزارشریف لویه لاره کې د طالبانو له لوري وسوځول شول.
