راپورونه د طالبانو په مشرتابه کې د ځینو بدلونونو په اړه خبر ورکوي. د دې ډلې مشر مل هبتالله اخندزاده تازه د ملاامیرخان متقي په ګډون د قطر دفتر اته غړي ګوښه کړي او څلور نور یې ور شامل کړي دي. نوموړي په نظامي برخه کې هم د ملامحمدعمر زوی ملایعقوب د ملاابراهیم صدر پر ځای د طالبانو د نظامي کمېسیون رییس ټاکلی دی.
که څه هم د طالب ډلې په منځ کې دا ډول بدلونونه معمولي خبره ده، خو د بینالافغاني خبرواترو په درشل کې د قطر دفتر د غړیو لرې کول او دغه راز د نظامي کمېسیون د مشر په توګه د ملاعمر د زوی ټاکلو د طالب ډلې د غړیو او خلکو په منځ کې ابهامونه پیدا کړي دي.
یوشمېر نظامي شنونکي وايي، په داسې حال کې چې بینالافغاني خبرې اترې په پیلېدو دي، دا ډول بدلونونه به د افغانستان لپاره ښه پیغام ونه لري.
د نظامي او استخباراتي چارو کارپوه محمد حیدري او د کورنیو چارو وزارت پخوانی مرستیال میرزامحمد یارمند وايي، د پاکستان استخبارات غواړي د سولې خبرواترو په درشل کې خپل نفوذي کسان د دې ډلې په مشرتابه کې وګوماري، څو ښه یې مدیریت کړای شي.
د دوی په وینا، د طالب ډلې په نظامي برخه او مرکچي پلاوي کې دغه بدلون رابدلون د هبتالله له خوا نه، بلکې د پاکستان له لوري کېږي، څو غوره شوي کسان بینالافغاني خبرې اترې د پاکستان په ګټه راوڅرخوي.
ومو غوښتل چې په دې اړه په قطر کې د طالبانو د سیاسي دفتر او دغه راز د سولې په چارو کې د دولت وزارت نظر هم له ځانه سره ولرو، خو له ډېرو اړیکو سره سره بریالي نه شوو.
د ویلو ده چې په طالب ډله کې د نظامي او سیاسي چارواکو بدلول او له دندو ګوښه کول له دې وړاندې هم شوي دي.
د طالبانو مشر او بنسټ اېښودونکي هم د خپل حکومت په دوره کې ملا دادالله اخوند له اصولو نه د سرغړونې او د هېواد په شمالي ولایتونو کې د وهلو ټکولو په جرم له دندې لرې او سلګونه نور کسان یې هم بېوسلې کړي وو.
