د کورنیو چارو وزارت ویاند طارق ارین نن د دوشنبې په ورځ يوه خبري ناسته کې وویل، د شهید اوونۍ د نمانځنې کميسیون پرېکړه کړې چې هېڅڅوک نهشي کولای چې د شهید اوونۍ نمانځنې په ورځ ناقانونه کړنې وکړي او دغې ورځې نه باید په خوندي او د عامه نظم له ګډوډېدو نه پرته فضا کې نمانځنه وشي.
ارين وویل، کوم کسان چې د شهید اوونۍ په ورځ د خلکو فزیکي او رواني امنیت خطر سره مخ کړي، امنیتي ځواکونو ته دنده ورکړل شوې چې دغو کسانو سره جدي چلند وکړي.
د نوموړي په وينا، له ملي امنیتي ځواکونو پرته نور هېڅڅوک حق نهلري چې له نظامي یونیفورم او وسلو سره وګرځي او همدارنګه نهشي کولای په هوايي ډزو لاس پورې کړي.
د کورنیو چارو وزارت ویاند زیاتوي، د شهید اوونۍ د نمانځنې کميسیون سره په تفاهم هوکړې ته رسیدلي چې هیچاته د وسلو لېږد او د هوایي ډزو اجازه نه ورکوي او همداراز هېڅڅوک د تورو ښيښو، بېاسنادو، بېپلېټه، په بېلابېل ډوله رنګونو د موټرو له رنګولو او غیرقانوني موټرو د ګرځونې حق نهلري چې د سرغړونې پر مهال به یې وسایط ضبط کېږي.
ارين وويل، هېڅڅوک حق نهلري څو د کاروانونو په بڼه د سړکونو نظم له منځه یوسي او پر سړکونو د ترافیک جریان له بندښ سره مخ کړي او همداراز يې زياته کړه چې په کاروانونو کې د دولتي وسایطو له استفادې نه په کلکه ډډه وکړي او د لیدلو په صورت کې به له جدي قانوني چلند سره مخ شي.
د کورنیو چارو وزارت ویاند وايي، ملي امنیتي ځواکونو ته لارښوونه شوې څو هغه هټۍ چې د وسایطو د رنګ په بدلولو او تزیین لاس پورې کوي، ویې تړي او له څښتنو سره یې قانوني چلند ترسره کړي.
له دې سره د احمدشاه مسعود بنسټ مشر احمدولي مسعود هم د سنبلې پر اتلسمه چې د احمدشاه مسعود ۱۸م تلین سره برابره ده، د امنیت او عامه نظم پر خونديوب ټینګار کوي.
