د حج او اوقافو وزارت چارواکي وايي، چې سږکال د حج په مراسمو کې ۳۴ تنه وژل شوي او ۳۷ نور ټپيان دي.
د یاد وزارت مرستيال داعي الحق عابد نن پنجشنبه (اکټوبر۸ مه) د يوې خبري ناستې په ترڅ کې وویل، چې د ۳۴ وژل شويو کسانو له ډلې ۱۰ تنه د جرثقیل (کرن) د سقوط له امله وژل شوي.
د حج او اوقافو وزارت مرستیال زياتوي، چې د "منا" په پېښه کې يواځې ۳ تنه وژل شوي او ۵ نور يې تر اوسه هم لادرکه دي.
داعي الحق دا هم وویل، سږکال د افغانستان له بېلابېلو ولایتونو څخه ۲۴ زره تنه د حج مراسمو د ادا کولو په موخه لېږل شوي وو، چې د دغو له ډلې تر اوسه شاوخوا ۸ زره تنه يې افغانستان ته بېرته راوړل شوي دي.
په سږني حج مراسمو کې د دوو جلا پېښو له امله په مسجدالحرام او منا کې ۸۷۶ تنه حاجيان ووژل شول او ۱۰۹۳ تنه نور يې ټپيان شول.
لومړۍ پېښه په مسجد الحرام کې د جرثقیل د غورځېدو له امله رامنځ ته شوه او د عربستان د چارواکو په وينا دويمه پېښه يې بیا د زيات بیروبار او ګډوډيو له امله د حج مراسمو په يوه لاره کې را منځ ته شوه.
