د نفتي توکو رییس فرید الله شیرزی وایي، چې په منځنۍ اسیا کې د ولسمشر ځانګړی استازی شاکر کارګر په دې وروستیو کې ازربایجان هېواد ته سفر کړی او هلته یې له چارواکو سره د ۱۵۰ زرو ټنو ګازو تړون لاسلیک کړی دی.
نوموړي وویل، چې دمګړۍ ۳ زره ټنه ګاز هرات ته رسېدلي دي او په دې سره به د ګازو بیې راټیټې شي.
شیرزی وايي، چې خصوصي سکتور د ۵۰ زره ټنو او د سوداګرۍ وزارت ۱۸ زره ټنو ګازو زېرمې لري.
د ده پر خبره، وزارت کافي اندازه ګاز زېرمه کړي دي، دی د ګازو د قیمت زیاتوالي لامل د ژمي پیل په ګوته کوي.
شیرزی وايي، په هرات ولایت کې اوس مهال د ګازو بیه په یوه کلیو کې ۸ افغانۍ راکمه شوې ده او کابل ته په را سېدو سره به دلته هم بیې را ټېټې شي.
د افغانیو ارزښت د ډالر په وړاندې کم خو د نورو اسعارو په پرتله لوړ دی
د مشرانو جرګې نننۍ (سه شنبه) عمومي غونډې ته د سوداګرۍ او صنایعو وزارت چارواکي او د افغانستان بانک لوی ریس د ډالرو او نورو بهرینو اسعارو په وړاندې د افغانیو ارزښت کموالي په اړه ور بلل شوي وو.
د افغانستان بانک لوی رییس خلیل صدیق وویل، ډالر په نړیواله کچه لوړشوي دي او په افغانستان کی خراب امنیتي حالت، د کورنیو تولیداتو او اقتصادي ودې کموالی، چې له ۳ اشاریه ۷ سلنه څخه ۱ اشاریه ۷ سلنوته راټیټ شوي دي.
ده وویل، چې دغه او دې ته ورته نور لاملونه د دې سبب شوي دي، چې د افغانۍ ارزښت د ډالر پروړاندې راټیټه کړي، خو زیاتوي، چې افغانۍ د نورو اسعارو پر وړاندې خپل ارزښت ساتلی دی.
په ورته وخت کې نن (سه شنبې) په هرات ولایت کۍ د سوداګرۍ او صنایعو خونې او صرافانو ټولنې مشرانو خبري غونډي ته وویل، چې د بهرنیو اسعارو بیه ډیره لوړه شوې او د خوراکي توکو په نرخونو یې نا وړه اغیزه کړې ده.
د دغې ټولنې رییس بهاالدین رحیمي حکومت ګرم و باله، چې په خپله یې داسې ناسم اقتصادي حالت ته زمېنه برابره کړې ده.
له بل لوري د سوداګرۍ وزارت مرستیال صلاح الدین سحر له حکومته وغوښتل، چې د افغانستان او پاکستان ترمنځ اپټا ترانزيټي تړون موده پوره شوې ده.
ده زیاته کړه، چې دغه تړون د افغان سوداګرو له پاره زیاتې ستونزې درلودې اوس پکار ده، چې غور پرې وشي.
د مشرانو جرګې د سه شنبې ورځې عمومي غونډې په پای کې د جرګې رییس فضل هادي مسلیمیاروویل، چې د چارواکو ځوابونه د وکیلانو د قناعت وړ نه و او زیاته کړه، چې بلې غونډې ته دې بیا راوبلل شي.
