د تخار ولایت د پولیسو امنیه قوماندان نور محمد حکیمي وايي، چې د سولې له بهیر سره یوځای شویو وسله والو طالبانو د معاش او مادي امکاناتو له پیداکولو وروسته یو ځل بیا د طالبانو لیکو ته ورغلي دي.
د دې ولایت د سولې شورا رییس مامور حسن د دې خبر پخلی کوي او د کابل د سولې عالي شورا مرکزي د فتر په ناغېړۍ او نه کارکولو تورنه وي.
د تخار ولایت د پولیسو امنیه قوماندان نور محمد حکیمي سلام وطندار سره په خبرو کې وویل، چې زیات شمېر هغه وسله والو طالبان چې د سولې له عالي شورا سره یو ځای شوي وو اوس د امتیازاتو او مادي امکانانو له اخیستلو وروسته له وسله والو طالبانو سره یو ځای شوي دي.
دی وايي، دغه وسله وال چې بېر ته د طالبانو لیکو ته ورغلي وو، درې، څلور تنه یې د افغان امنیتي ځواکونو سره په مخامخ نښته کې وژل شوي دي.
نوموړی وايي، کله چې طالبان په مخامخ نښته کې د افغان امنیتي ځواکونو له خوا راګېر شي، د ځان د ژغورلو له پاره د سولې پيغام او بیرغ پورته کوي.
د تخار ولایت امنیه قوماندان سره له دې چې د دې ولایت د سولې عالي شورا هڅې ستايي، خو وايي، چې د سولې خبرو پایلو ته هیله من نه دی.
د تخار ولایت د سولې عالي شورا رییس مامور حسن وايي، د سولې عالي شورا د مرکزي دفتر هڅو او کم کاریو دوی او د تخار ولس اندېښمن کړی دی.
دی وايي، چې د در قدو په نښته کې ۴۵ وسله وال طالبان د سولې له بهیر سره یو ځای شول، د یوځای شویو کسانو ځېنې طالبانو ووژل، ځېنې بېرته له طالبانو سره یو ځای شول او پاتې کسانو یې هېواد پرېښود.
دی وايي، چې د سولې عالي شورا د کابل مرکزي دفتر دغو کسانو ته هیڅ پاملرنه ونه کړه.
