د افغانستان د ملي امنیت شورا ویاند قادرشاه وايي، محمد حنیف اتمر د پاکستان لومړي وزیر رسمي بلنې پر اساس چې له افغان ولسمشر یې کړې وه؛ دغه هېواد ته سفر کړی دی.
قادرشاه سلاموطندار ته وویل، د افغانستان د ملي امنیت شورا سلاکار ښاغلی اتمر به په دغه یو ورځني سفر کې د افغانستان او پاکستان د سولې او پیوستون د عمل ګډ پلان تطبیق په اړه د دغه هېواد له چارواکیو سره خبرې وکړي.
د ملي امنیت شورا ویاند زیاته کړه، شاوخوا یوه اوونۍ وړاندې هم افغان پوځي پلاوي پاکستان ته سفر کړی و او د دواړو هېوادونو د سولې او پیوستون د عمل ګډ پلان پلي کېدو په اړه یې خبرې کړې وې.
ښاغلی قادرشاه وايي، پاکستان ته د ملي امنیت شورا سلاکار په سفر کې به د افغانستان، پاکستان او سیمې امنیتي ستونزې وڅېړل شي او په دې توګه به دواړه هېوادونه یوې معقولې حل لارې ته لاسرسي پیداکړي.
د ملي امنیت شورا ویاند په وینا ښاغلی اتمر به دغه یو ورځني سفر کې د افغانستان او پاکستان د سولې عمل پلان د عملي چارو په بېلابېلو خواوو بحث وکړي او د دغو مسلو تعقیبولو لهپاره به دواړه هېوادونه پرېکړه وکړي او مختلیفو کمېټو ته به دنده وسپارل شي، چې له مخې به یې د سولې او پیوستون عمل پلان پلي شي.
د ملي امنیت شورا سلاکار داسې مهال پاکستان ته سفر کوي چې د دواړو هېوادونو ترمنځ اړیکې ترینګلې دي.
