د سمنګان یو شمېر اوسېدونکي او مدني فعالان ادعا کوي چې د سولې مشورتي لویې جرګې کې د ګډون لهپاره د دې ولایت په هېڅ ځای کې ټاکنې نهدي شوي او ۲۴ تنه دې جرګې ته له ټاکنو پرته معرفي شويدي.
دوی ولایت مقام او د ولایتي شورا غړي پهدې تورنوي چې خپل او خپلوان یې جرګې ته معرفي کړي.
د سمنګان مدني ټولنو د عدالتغوښتنې شبکې رییس وفیعالله شاهرخي هم وايی چې ولایتي شورا د مدني فعالانو سره له همغږۍ پرته حکومت ته د لویې جرګې د ګډونوالو نوملړ لېږلی دی.
په سمنګان کې یوې باوري سرچینې په راپور کې د نوم نه یادلو په شرط سلاموطندار ته وویل چې ولایت مقام، ولایتي شورا او ځېنو محلي مسوولانو د دې ولایت په ولسوالیو کې په خپلو کې تفاهم کړی د څوو مشخصو کسانو نوملړ یې حکومت ته لېږلی دی.
خو د ولایتي شورا مرستیال محمدهاشم سروري دا ادعاوې ردوي او وایي چې تېره چهارشنبه د دوی په حضور کې د دې ولایت په ټولو اوو ولسوالیو کې ټاکنې وشوې چې د سولې مشورتي لویې جرګې لهپاره ترې د ۷ ښځو په ګډون ۲۴تنه انتخاب او حکومت ته معرفي شول.
پهدې اړه مو د سمنګان ولایت مقام د نظر اخېستلو هڅه وکړه؛ خو هغوی خبرو کولو ته حاضر نهشول.
د سولې مشورتي لویه جرګه به د روان کال د ثور پر ۹مه نېټه په کال کې د ۲۵۰۰تنو په حضور جوړه شي. دا جرګه به له طالبانو سره د سولې خبرو اترو د څرنګوالي په اړه بحث وکړي.
