د سلام وطندار د اوزبیکي خپرونې یو کال پوره شو

د افغانستان د ترک تبارانو مدني بنسټ تېره ورځ (جمعه جنوري۲۱مه) په اوزبیکي ژبه د سلام وطندار د راډيو او ویب سایټ د خپرونې یو کلنۍ موده ولمانځله.

په دغه لمانځ غونډه کې ځينو ګډون کوونکو پر حکومت تور پورې کړ، چې له تېرو ۱۴ کلونو راهیسې د افغانستان ملي ژبې اوزبيکي ته خدمت نه دی کړی.

د افغانستان د ترک تبارانو بنسټ غړی او د کابل پوهنتون استاد حمیدالله تاداش وویل، چې د افغانستان ملي ټلویزیون د دولت په پېسو نشرات کوي، خو تر اوسه يې هم د هېواد ځينو نورو ملي ژبو ته ځانګړې پاملرنه نه ده کړې.

دغو ګډون کوونکیو د سلام وطندار راډيو او ویب سایټ له لارې د اوزبيکي ژبې له خپرونو د ځانګړې مننې ترڅنګ وویل، چې باید ټول افغانان یو بل او خپلې ژبې ښه و پيژني.

د ولسي جرګې پخوانی غړی او د سياسي چارو کارپوه سردار محمدرحمان اوغلي وویل، ترڅو چې افغانان یو بل په ښه توګه و نه پيژني او د یوبل کړه وړه و نه زغمي، نو د یو موټي کېدو پر لوري تګ به ستونزمن وي.

نوموړي زیاته کړه، چې د اطلاعاتو او فرهنګ وزارت له لوري اوزبیکي ژبې ته نه پاملرنه به د دولت او ملت ترمنځ د واټن رامنځ ته کېدو لامل شي.

د انټرنیوز رسنیز سازمان مرستیال کاوه اهنګر وايي، چې د افغانستان ژبې د نقاشي تابلو مثال لري او که چېرې په دغه تابلو کې يو رنګ هم کم شي، نو تابلو به ورسره بدې ښکاره شي.

د هغه په خبره نه باید موږ د هېواد هيڅ ژبې د حذفولو تکل وکړو.

یاده دې وي، چې سلام وطندارد اوزبیکي ژبې راډيويي خپرونې د ۲۰۱۴ م ز  په ډسمبر میاشت کې پېل کړې.

همدارنګه په اوزبیکي ژبې د سلام وطندار انلاین خپرونې بیا د تېر ۲۰۱۵ م ز کال په فبرورۍ میاشت کې پېل شوې.

پټه دې پاتې نه وي، چې د سلام وطندار ویب پاڼه له تېر یوه کال راهیسې په څلورو پښتو، فارسي، اوزبيکي او انګلیسي ژبو فعالیت کوي.