د ټولګټو وزارت چارواکیو نن د یوې خبري غونډې پرمهال بغلان او بدخشان ولایتونو کې له دوو نورو پروژو سره یوځای د سالنګ لویې لارې د اساسي مطالعاتو او بیارغولو طرحې قرارداد لاسلیک کړ.
د سالنګ لویې لارې بیارغولو طرحه او د اساسي مطالعاتو پروژه له پروان ولایته پیلیږي او تر بغلان پورې دوام کوي.
د دغې لویې لارې ۸۶ کیلومتره سړک د ۵.۷ میلیارد امریکايي ډالرو په ارزښت په ۱۲ میاشتو کې د نړۍوال بانک په مالي مرسته رغول کېږي.
همداراز په دوو نورو تړونونو کې په بغلان ولایت کې د ۱۶ میلیونو افغانیو په ارزښت د ۳۳ متره په اوږدوالي او د ۱.۵ متره سور په درلودو د یو پلچک جوړول او په بدخشان کې د ۱۱ میلیونو او ۶۰۰ زرو افغانیو په ارزښت د ۱۰ پُلچکونو او د ۵.۹ متره ارتفاع په درلودو او د ۱۵۰ مترو په اوږدوالي سره د استنادي دېوال جوړول شامل دي.
د ټولګټو وزیر یما یاري وايي چې د سالنګ لویې لارې خرابېدو لوی لامل دغه سړک ته په اساسي توګه د چارواکیو نه پام دی.
ښاغلی یاري زیاتوي چې د دغو مطالعاتو په ترڅ کې د دوشي- بامیانو لویې لارې په جوړولو چې د سالنګ لویې لارې بدیل دی هم کار شوی دی او دغه پروژه به تر راتلونکیو دوو کلونو پورې بشپړه شي.
د سالنګ لویه لار د هېواد یو له مهمو لویو لارو شمېرل کېږي چې له اقتصادي او ټولنیز اړخه ډېر ارزښت لري. د هېواد ۱۱ شمالي ولایتونه له دغې لارې په مستقیم ډول ګټه پورته کوي.
