«زموږ ښار زموږ کور» په شعار سره یو شمېر مدني فعالانو، د ملګرو ملتونو یا UNDP چاپېریال ساتنې ملي ادارې او کابل ښاروالۍ له خوا ونماځل شوه.
دغو لسګونو رضاکارانو د دوشنبې پر ورځ د کابل قرغې بند اړوند سیمو نه د ملي حشر په ډول کثافات او خزلې راټولې کړې او له نورو خلکو يي د ښاري فرهنګ په برخه کې د مرستې غوښتنه وکړه.
د رضاکارانو نړیوالې ورځې په مناسبت د قرغې بند شاوخوا سیمو پاکولو په موخه دغه پروګرام د کابل ښاروالۍ، مدني فعالانو، د چاپېریال ساتنې ملي ادارې او په افغانستان کې د ملګرو ملتونو یا UNDP له خوا جوړ شوی و.
د دې کمپاین یو غړي او مدني فعال خالد مبارز سلام وطندار سره په خبرو کې وویل، چې د چاپېریال پاک ساتل او د ښاري فرهنګونو مراعتول یوازې د دولت کار نه دی، بلکې ټول وګړي مسوول دي، چې ښار او خپل شاوخوا چاپېریال پاک وساتي.
د کابل ښاروالۍ د تنظیف عمومي رییس عبدالتواب احمدي هم مني، چې د ښار پاک ساتلو برخه کې یې پراخ کار نه دی کړی، خو وايي، چې د دوی د کمکارۍ لامل د کارکوونکیو کموالی، د خلکو د نفوس زیاتوالی او کم امکانات دي.
د ده په خبره، په پام کې لري، چې په نږدې راتلونکې کې به د کابل ښار د پاکوالي او منظم والي له پاره خپلې لنډمهالې او اوږدمهالې طرحې او پروګرامونه پیل کړي.
بل خوا سید فرهاد زلمي د ملګرو ملتونو یا UNDP مطبوعاتي مسول وویل، چې د رضاکارانو موخه یوازې د چاپيریال ساتنې نړیوالې ورځې په نامه د چاپېریال پاکوالی نه دی، بلکې په دې ډول کولی شو، چې د ناروغانو، بې ځایه شویو او راستنېدونکو کډوالو او بېړنیو پېښو له زیانمنو شویو کورنیو سره مرسته وکړو.
په همدې اړه د چاپېریال ساتنې ملي ادارې معین عبدالولي مدقق وايي، چې دغه ډول پروګرامونه د چاپېریال ساتنې د عامه پوهاوي په زیاتوالي کې مرسته کوي.
د ده پر وینا، دا پروګرامونه ټولنیز او اقتصادي اغېز هم لري او دولتي بنسټونو سره د چاپېریال ساتنې برخه کې اغېزمن دي.
