بلاخره د ملي یووالي حکومت وروستی وزیر معرفي شو. د افغانستان ولسمشرۍ ماڼۍ ویلي، چې د سولې د عالي شورا پخوانی غړی معصوم ستانکزی یې د ملي دفاع وزیر په توګه ولسي جرګې ته معرفي کړی دی.
د ولسمشرۍ ماڼۍ ویاند اجمل عبید عابدي په ټیلفوني اړیکه کې سلام وطندار ته وویل، چې معصوم ستانکزی یې د ملي دفاع د وزیر په توګه د باور رایو د اخیستلو لپاره ولسي جرګې ته ورپېژندلی دی او همدارنګه ډګر جنرال قدم شاه شهیم د لوی درستیز په توګه او ډګر جنرال عبدالخالق د ملي دفاع وزارت د لومړي مرستیال په توګه مقرر شوي دي.
د عبید عابدي په خبره، تېره ورځ د ولسمشر له خوا د ښاغلي ستانکزي د نوماندۍ او د ډګرجنرال شهیم او عبدالخالق د مقررۍ مکتوبونه لاسلیک شول.
ولسمشر غني د لومړي ځل لپاره د غويي پر ۳۰مه د افغانستان لپاره د تماس نړیوالې ډلې په غونډه کې د معصوم ستانکزي د نوماندۍ په اړه خبرې وکړې.
پر دغې موضوع د اسلامي جمعیت ګوند مشرانو او د بلخ د ځای ناستي والي عطا محمد نور عکس العمل ښودلی دی. ده معصوم ستانکزی د دغه ګوند د پخواني مشر برهان الدین رباني قاتل بللی دی.
دغې مسلې د دې باعث شوې، چې د اجرایه ریاست او د اسلامي جمعیت د ګوند ترمنځ اختلافات راپیدا کړي، خو کارپوهان دغه اختلافات عادي ګڼي او وايي، چې د عطا محمد نور له خوا معصوم ستانکزي سره ځکه مخالفت ښودل کېږي، چې ستانکزی د برهان الدین رباني قاتل ګڼي.
د سیاسي چارو کارپوه جاوېد کوهستاني سلام وطندار ته وویل، چې دغه اختلافات تر هغې اندازې د اندېښنې وړ نه دي، چې د اسلامي جمعمیت د ګوند او د حکومت د اجرایه ریاست تر منځ اړیکې خرابې کړي.
د کوهستاني په خبره، د ملي دفاع وزارت لپاره د معصوم ستانکزي نوماندي د ملي یووالي حکومت د مشرانو په مشوره او د دغه وزارت لپاره د مناسب وزیر د نشتوالي له امله شوې ده او داسې برېښي چې د عطا محمد نور مخالفت به د ملي یووالي حکومت پر کړې پرېکړې کوم اغېز ونه لري.
وروسته له ۷ میاشتو د ملي دفاع وزارت لپاره دغه کلیدي پوسټونه یو ځای اعلان شول او دا په داسې حال کې ده، چې هره ورځ د هېواد امنیتي حالت مخ پر خرابېدو دي او تر اوسه معلومه نه ده، چې ولسی جرګه به د ملي دفاع وزارت نوماند ته د باور رایه ورکړي او که نه؟
