نن سهار کابل ښار د خپلواکې ورځې د ۱۰۱مې کلیزې له نمانځلو سره هممهاله د څو راکېټونو د لګېدلو شاهد و.
د کورنیو چارو وزارت طارق ارین وايي چې نن سهار شاوخوا نهه نیمې بجې د کابل ښار پر لومړۍ، دویمې، لسمې، نهممې او شپاړسمې امنیتي حوزې ۱۴ راکېټونه لګېدلي دي.
د نوموړي په وینا، یاد راکېټونه د خلکو پر کورونو لګېدلي چې له کبله یې د ۴ ماشومانو او یوې ښځې په ګډون، ۱۰ کسان ټپیان شوي دي.
ارین زیاتوي، یاد راکېټونه له دوو موټرو چې د کابل په اتمه او اوولسمه امنیتي حوزو کې ځای پر ځای شوي وو، ويشتل شوي او په تړاو یې د اوولسمې حوزې له اړوندو سیمو دوه کسان نیول شوي دي.
دغه راکېټونه هغه مهال د کابل ښار پر بېلابېلو سیمو ولګېدل چې ولسمشر محمداشرف غني له نورو لوړپوړیو دولتي چارواکو سره د ملي دفاع وزارت په انګړ کې د خپلواکۍ پر منار د ګلو ګېډۍ کېښوده.
دغه مراسم له ملي ټلوېزیون نه په ژوندۍ بڼه خپرېدل، خو د راکېټونو له غږ څو شېبې وروسته یاده ژوندۍ خپرونه بنده شوه.
ملي ټلوېزیون له دې مخکې ویلي و چې ولسمشر به په یادو مراسمو کې وینا هم وکړي.
ولسمشرۍ ماڼۍ هم ویلي چې په یادو مراسمو کې دولتي چارواکو او په کابل کې د بهرنیو هېوادونو سفیرانو او استازیو ګډون کړی و.
تر اوسه د طالبانو په ګډون، هېچا او ډلې د دغو راکېټونو د ويشتلو مسوولیت پر غاړه نه دی اخیستی.
