ټاکل شوې وه چې ولسي جرګه نن د شهیدانو او معلولانو د کورنیو ملاتړ ادارې، د تخنیکي او مسلکي زدهکړو ادارې او د نفوسو د احوالو د ثبت ادارې د خپلواکۍ په اړه بحث او پرېکړه وکړي، خو د دې جرګې یو شمېر غړي د یادو ادارو له خپلواکۍ سره مخالفت ښيي او وايي، د خپلواکو اداري واحدونو جوړولو په اړه پرېکړه یوازې د ملي شورا د دواړو جرګو واک دی.
د اساسي قانون د ۹۰ یمې مادې په څلورم بند کې لیکل شوي، د اداري واحدونو جوړول، تعدیل یا لغوه د ملي شورا واک دی.
د ولسي جرګې غړي فوزیه کوفي او فکوري بهشتي وايي، د اساسي قانون له مخې د خپلواکو اداري واحدونو رامنځته کول د ولسمشر نه، بلکې د ملي شورا واک دی.
دوی زیاتوي، یادې ادارې د اساسي قانون خلاف جوړې شوې، ملي شورا ته ځوابویونکې نهدي او دغه راز ډېره بودیجه لګوي چې پر ملي بودیجې یو دروند بار دی.
په همدې حال کې د ولسي جرګې غړي عبدالستار خواصي او صالحمحمد سلجوقي وايي، له وزارتونو نه د یادو ادارو بېلوالی خلکو ته د خدماتو وړاندې کولو برخې کې ګټورې تمامېدای شي او پهکار ده چې تر وزارته پورې ارتقا وکړي.
بلهخوا د ولسي جرګې رییس عبدالرووف ابراهیمي د غونډې جمعبندۍ پرمهال وویل، ولسي جرګه د خپلواکو ادارو جوړول نه مني؛ ځکه حکومت هڅه کوي چې ولسي جرګې ته د ځواب نه ویلو لهپاره ځینې ادارې خپلواکې او د ملي شورا له نظارته لرې وساتي.
ولسي جرګې کې د لازم نصاب نه موجودیت له کبله د شهیدانو او معلولانو د کورنیو د ملاتړ ادارې، د تخنیکي او مسلکي زدهکړو او د نفوسو د احوالو د ثبت خپلواکو ادارو د سرنوشت په اړه پرېکړه و نهشوه او په اړه یې رایهورکول بلې غونډې ته وځنډېدل.
