د تخار ولایت، چال ولسوالۍ د زمبورک کلي اوسیدونکې ۱۷ کلنه مینګ بيبي سلاموطندار ته وویل، چې د ملا طاهر په نوم خُسر يې دوه ځلې پرې جنسي تیری کړی دی.
د نوموړې پرخبره، د لومړي ځل لهپاره خُسر يې ورته د خوب ګولۍ (د خوب ټابلیټ) ورکړي او بیا يې پرې تجاوز کړی، خو په دویم ځل يې بیا بیګاه شپه د هغې د خوب کوټۍ ته ورغلی او تيری يې پری کړی دی.
مینګ بيبي زیاتوي، چې ۱۰ میاشتې وړاندې خالالدین په نوم د یو هلک له خوا، چې د ملا طاهر زوی دی د لومړي ځل لهپاره پرې جنسي تیری وشو او بیا په محکمه کې ورسره نکاح وکړه، خو د ماشومانو د تربيې په مرکز کې له ۳ میاشتې تېرولو وروسته ازاده شوه او د خپل خُسر کور ته ورغله.
د نوموړې پر وینا، خالالدین اوسمهال په حبس کې پروت دی.
مینګ بيبي سلاموطندار ته وویل، چې ورور يې د دې د وژلو پلان لري او که يې امنیتي مسوولین ځاني امنیت و نه ساتي نو د خپل ورور پواسطه به ووژل شي.
له بل لوري د جوزجان د پولیسو قوماندان فقیر محمد جوزجاني هم تایدوي، چې نن (پنجشنبه جون۲۲مه) د مینګ بيبي په نوم یوه ځوانه ښځه د پولیسو قوماندانۍ ته ورغلۍ او ادعا يې کړې، چې د خُسر له خوا پرې جنسي تېری شوی دی.
جوزجاني وايي، چې ملاطاهر د پولیسو له خوا نیول شوی دی او څېړنې ترې روانې دي.
د امنیه قوماندان پر وینا، ځينې سیمهییز قومي سپینږیري د دغې موضوع د حل په موخه چال ولسوالۍ ته ورغلي.
له بل لوري بیا د تخار ولایت د ښځو چارو رییسه رزم آرا حواش وايي، چې دوی د نجلۍ د ځان نه خوندیتوب په اړه اندېښمن دي.
نوموړې د افغان امنیتي ځواکونو څخه غوښتنه وکړه، چې د دغې ښځې د امنیت د ټينګښت په اړه هڅې وکړي او د تالقانو ښار ته يې وليږدوي.
