د ټاکنو خپلواک کمېسیون د یوې خبرپاڼې په خپرولو سره د ټاکنو قانون تعدیل لهپاره د حکومت وړاندیز شوې طرحې په اړه غبرګون ښودلی.
په خبرپاڼې کې راغلي، اوسني وخت کې ـ چې د ولسمشرۍ راتلونکیو ټاکنو ته د ولسمشر محمداشرف غني او اجرایوي رییس عبدالله عبدالله په ګډون نوماندان دي ـ د ټاکنو قانون تعدیل، د افغانستان راتلونکې ته خطرناکه پایلې لرلی شي او له ټاکنو وروسته شخړې به هېواد کې د کړکېچ لامل شي.
د ټاکنو خپلواک کمېسیون خبرپاڼې کې راغلي چې د ټاکنو قانون د تعدیل لهپاره د ارګ مقدماتي غونډو کې د کمېسیون هېڅ استازي ګډون نهدی کړی او دغه تعدیل د ولسمشر راتلونکیو ټاکنو ځنډولو لهپاره یوه پلمه ده.ورته مطالب:
ټیفا: د سولې ناڅرګند برخلیک به پر ولسمشریزو ټاکنو اغېز وکړي
د ولسي جرګې ټاکنو پرمهال د ټیفا موندنې
ټیفا: ۱۰۸ نوماندانو له ټاکلې اندازې ډېر لګښت کړی
دغه راز په خبرپاڼې کې ویل شوي چې د ټاکنو خپلواک کمېسیون د ټاکنو قانون تعدیل په رسمي ډول لویې څارنوالۍ او د اساسي قانون پر پلي کېدو د څار کمېسیون ته راجع کړی چې پهدې برخې کې کمېسیون او نورو هغو بنسټونو سره ـ چې د ټاکنو قانون تعدیلولو په هڅه کې دي ـ خپل حقوقي نظرونه شریک کړي.
د رڼو ټاکنو بنسټ یا تیفا مسوولانو هم کابل کې یوې خبري غونډې ته وویل، د حکومت له لوري د ټاکنو قانون تعدیل لهپاره وړاندیز شوې طرحه حکومتي او سیاسي ده او پهدې طرح کې د ولسمشر د صلاحیتونو د زیاتو او غښتلي کولو هڅه شوې.
د تیفا مشر نعیم ایوبزاده وايي، د ټاکنو قانون کې سیاسي سمون راوستل د ټاکنو رڼښت او سراسروالي نهشي تضمینولی. د دې بنسټ مسوولانو پخوا هم ویلي وو په ټاکنیز نظام کې سمون راوستل یوازې شعار دی.
د دې موضوع په اړه د ولسمشر مرستیال ویاند شاهحسین مرتضوي وایي چې د ټاکنو قانون تعدیل طرح له نوماندانو، سیاسي ګوندونو او مدني بنسټونو سره له ۲۰ د زیاتو مشورتي غونډو پر اساس چمتو شوې او د دې طرحې زیاته برخه پر ټاکنو د څار مدني بنسټونو وړاندېزونه جوړوي.
حکومت د ټاکنو قانون د تعدیل مسوده هم چمتو کړېده او د ولسمشري له نورو نوماندانو سره د دې طرحې د همغږۍ لهپاره هڅې روانې دي.
