د تدارکاتو ملي کمیسیون وايي، چې دوی په تېرو ۸ ناستو کې د ۶ وزارتونو او یوې خپلواکې ادارې قراردادونه ارزولي او په پایله کې یې ۵ میلیارده افغانۍ سپما کړې ده.
د دغه کمېسیون رییس یما یاري وايي، چې د کمېسیون په تېرو ۸ غونډو کې د ۲۴ میلیارده افغانیو په ارزښت ۱۲۴ قراردادونه ارزول شوي، د ۱۳ میلیارده افغانیو په ارزښت ۸۲ قراردادونه تر کار لاندې دي، ۲۰ قراردادونه رد شوي او ۲۲ نور قراردادونه د ستونزو د حل او لازم سمون په موخه تر دقیقې کتنې لاندې دي.
نوموړی وايي، چې په یادو قراردادونو کې تر دې مهاله د پنځه میلیارده افغانیو په ارزښت سپما شوې ده، چې د ملي خزانې له پاره لویه لاسته راوړنه ګڼل کېږي.
د تدارکاتو د ملي کمېسیون غوڼده د ولسمشر اشرف غني په مشرې وړمه شپه ( مې ۳۰مه) په ارګ کې تر سره شوه.
په دغه ناسته کې د جمهوري ریاست دویم مرستیال قانون پوه محمد سرور دانش او اجرایه رییس ډاکټر عبدالله عبدالله هم حضور درلود، په دغه غونډه کې د کرنې، فواید عامې، عامې روغتیا، کورنیو چارو، ملي دفاع وزارتونو او د ملکي هوایي چلند مستقلې ادارې قراردادونه و ارزول شول، چې ځینې یې منظور او ځینې یې د لازمو اصلاحاتو په خاطر وځنډول شول.
جمهور رییس محمداشرف غني د کرنې وزارت د ۵ مسلخونو د جوړولو د پروژې په اړه وویل، د دې ډول پروژو له پیل او تطبیق وړاندې باید لازمه محیطي مطالعه او د سیمې له خلکو سره له نږدې تفاهم وشي.
افغان ولسمشر په دغه ناسته کې د فواید عامې وزارت د کابل – ارغندي د سرک په هکله وویل، دغه وزارت باید هره میاشت ارګ ته د خپل پرمختګ راپور راکړي او ولس هم په څارنه کې شامل کړي.
دغه راز غني وویل، د اقتصاد وزارت ته يې لارښوونه کړې، چې د نمونې په توګه په څو ولایتونو کې د عامې روغتیا وزارت روغتیایي خدمات وارزوي، څو معلومه شي چې څومره او په کوم کېفیت تخصص موجود دی او په ځانګړي ډول د ښځو له پاره کومې روغتیایي اسانتیاوې په پام کې نیول کېږي.
