د ازادو رسنیو د ملاتړ بنسټ یا نی اجرایوي رییس عبدالمجیب خلوتګر نن په کابل کې یوې خبري غونډې ته وویل، تراوسه د افغان سولې پروسې په روانو خبرو اترو کې د بیان ازادي او د رسنیو لاستهراوړنې نهدي یادې شوې او باید ورته پام وشي.
پهدې وروستیو کې د افغان سولې لپاره د امریکا د بهرنیو چارو وزارت د ځانګړي استازي زلمي خلیلزاد او طالب استازیو ترمنځ د قطر په پلازمېنې دوحې کې پرلهپسې شپږ ورځې خبرې وشوې چې د شنونکیو په اند د پام وړ پرمختګ پهکې شوی دی.
خو مجیب خلوتګر اندېښنه ښيي چې ګنې د سولې په روانو خبرو کې د بیان ازادي یا رسنۍ څنډې ته شوي او په وینا یې په هغې سوله کې چې دا دواړه ارزښتونه ځای و نهلري، د منلو نهده او د سولې تر هوکړې وروسته باید د رسنیو اړوندو بنسټونه ته پهدې اړه ضمانت ورکړل شي.
د نی اداره ټینګار کوي چې د سولې په اړه هغه جزیات چې د یاد بهیر د ځنډ لامل نه کېږي، له رسنیو سره شریک کړي او دغه راز د خبریالانو وژونکي او ورسره ناوړه چلنکوونکي باید پهدې پروسې کې و نه بښل شي او حکومت هم ورته پام وکړي.
خو ولسمشر محمداشرف غني چې نن یې د سولې په اړه ملت ته وینا کوله وویل، ملي یووالی، ملي واکمني، ځمکنۍ بشپړتیا، یو قوي مرکزي دولت او د افغانانو اساسي حقونه، زموږ سرې کرښې دي او پر یادو موضوعاتو هېڅ بحث نهشي کېدای.
.jpg)
دا په داسې حال کې ده چې ځینو هېوادوالو او د چارو شنونکیو تر دې وړاندې هم د سولې په روانې پروسې کې د خلکو د اساسي حقونو قرباني کېدو په اړه اندېښنه ښودلې وه.
