د بښنې نړيوال سازمان له افغان حکومته غوښتي چې له کورونا سره د مبارزې په برخه کې د بنديانو خوشې کولو کې دې ښځو ته لومړيتوب ورکړل شي.
ياد سازمان د بندیانو خوشې کولو په اړه د ولسمشر غني د فرمان پلي کیدو د سمدستي اقدام غوښتنه هم وکړه.
ولسمشر غني د کورونا ويروس د خپرېدو د مخنيوي لپاره دوه اوونۍ وړاندې د ښځو په ګډون د ۱۰زرو زيانمنو شويو بنديانو د خوشې کولو فرمان صادر کړ. د بښنې نړيوال سازمان وايي چې تر اوسه پورې ياد فرمان په بشپړه توګه نه دی پلی شوی.
ياد سازمان نن د يوې خبرپاڼې په خپرولو سره ويلي چې د کورونا ويروس له چټک خپرېدو سره په زندان کې د ياد ويروس د خپرېدو وېره ډېره ده چې ښځې په کې له جدي ګواښ سره مخ دي.
دوی وايي، د افغانستان زندانونو کې خلک ډېر دي او امکانات يې کم دي او دې ته په کتو يو شمېر ښځې له خپلو اولادونو سره په زندانونو ګې دي چې بايد ښځو ته لومړيتوب ورکړل شي.
