د ولسي جرګې یو شمېر وکیلانو په نننۍ عمومي غونډه کې پر امنیتي او کشفي بنسټونو له دې کبله نیوکه وکړه، چې ولې یې د باقرالعلوم په دیني او فرهنګي مدرسې د برید مخه ونه شوی نیولی.
د ولسي جرګې لومړی مرستیال ظاهر قدیر، چې د غونډې مشري یې کوله وویل، امنیتي مسوولین باید د برید موضوع جدي وڅېړي، عاملان یې پیدا او د خپلو اجراتو ریپوټ د لا نورو اجراتو له پاره ولسي جرګې ته ورولېږي.
ظاهر قدیر امنیتي چارواکو ته خبرداری ورکړ، که په دې برخه کې جدي عمل ونه کړي، ولسي جرګه به د امنیتي ارګانونو په اړه خپل قانوني صلاحیتونه اعمال کړي.
د ولسي جرګې وکیلانو د اعلاميې په خپرولو سره د تېرې دوشنبې ورځې برید په سختو ټکو وغندلو او دا یې یو غیراسلامي عمل وبللو.
د ولسي جرګې په اعلامیه کې راغلي، چې د دین او اسلام دوښمنان د جګړې په ډګر کې د امنیتي ځواکونو د مقابلې توان نه لري او اوس د افغانانو تر منځ د قومي او مذهبي نفاق اور بلوي.
په اعلامیه کې له امنیتي ځواکونه غوښتل شوي، چې پر دیني بنسټونو او نورو ځایونو د بریدونو مخنیوی وکړي.
دغه راز ولسي جرګې له نړیوالې ټولنې د ترهګرو په خلاف د اقدام غوښتنه کړې.
حکومت د حقیقت موندنې کمېسیون په جوړولو د خپل مسوولیت له ځوابه تښتي
یو شمېر وطنوالو نن ورځ د باقرالعلوم پر دیني مدرسې کې د وژل شويو ولسي خلکو د جسدونو خښولو په مراسمو کې وویل، حکومت تل د ځان مرګو بریدونو پلټنو په اړه د حقیقت موندنې کمېسیونونه جوړوي، په داسې حال کې چې دغو کمېسیونونو هېڅ وخت حقیقت ښکاره نه کړ.
په دې مراسمو کې یو شمېر کابل ښاریانو، چارواکو او د ولسي جرګې ځینو غړو ګډون کړی وو.
ګډونوالو د یوې اعلامیې په خپرولو سره وویل، چې دوی له حکومته د حقیقت موندنو کمېسیونونه نه غواړي، بلکې د ولس د ځان او مال د امنیت ټینګښت غواړي.
په اعلامیه کې راغلي، چې د ترهګرو په لاس د وطنوالو وژنه بشري جنایت دی او نړیواله ټولنه باید د دې پېښې عاملان او ملاتړي د جنګي جنایت کارانو په توګه وپېژني.
دغه راز، د اجرایوي ریاست مرستیال محمد محقق مراسمو ته وویل، چې د وطنوالو په نښه کولو نوې څپه پیل شوې ده.
محقق له حکومته وغوښتل، چې د ترهګریزو پېښو په څېړلو کې باید له ډېر جدیته کار واخلي.
همدا ډول د کورنیو چارو وزارت د دې پېښې په تړاو د شپږمې امنیتي حوزې د ۶ مسوولینو دندې ځنډولي او د یادې پېښې څېړلو له پاره يې یو پلاوی ټاکلی دی.
د روانې اونۍ د دوشنبې په ورځ د کابل ښار شپږمې نا حیې اړوند سیمه کې د باقرالعلوم په دیني مدرسه کې ځانمرګی برید وشو، چې زیات شمېر کسان د عاشورا څلویښتي مراسمو ته ورټول شوي وو.
په دغه برید کې له ۳۰ ډېر کسان ووژل شول او له ۸۰ ډېر نور ټپیان شول.
