د بغلان ولایتي شورا رییس محمدصفدر محسني وايي چې ملي اردو د بهرنیو پوځیانو په همکارۍ څلور ورځې مخکې له طالبانو نه د دې ولایت د ډنډۍ غوري ولسوالۍ د پاکولو په پار پوځي عملیات پیل کړل؛ خو د پنجشنبې په شپه یې د نامعلومو دلایلو له امله سیمې پرېښودې او طالبانو بیاځلي د دې ولسوالۍ ۱۰ کلي بېرته ونیول.
د بغلان د ولایتي شورا رییس د ملي اردو، بهرنیو پوځیانو او محلي مسوولانو ترمنځ ناهمغږي د جنګ د پراختیا او بېځایه شا تګ په معنا ګڼي.
یوې امنیتي سرچینې د نوم نه ښودلو په شرط سلام وطندار ته وویل چې د دوی د عملیاتو موخه طالبانو ته تلفات اړول او د دې ډلې د مرکزونو ورانول وو؛ خو د بغلان ځايي مسوولان له طالبانو نه د سیمو له پاکولو وروسته د هغو د ساتلو وس نهلري.
په ورته وخت کې د بغلان امنیه قوماندان اکرامالدین سریع وايي چې دوی پهدې عملیاتو کې ګډون لرلو او د مرکزي حکومت له لوري د سیمو د ساتلو هېڅ ډول امر نهدی ورکړل شوی.
د بغلان د ولایتي شورا مرستیال شمسالحق بارکزی بیا دا عملیات ناکام بولي او وايي، پهدې عملیاتو کې ملکیانو ته سخت تلفات اوښتي. د ښاغلي بارکزي په وینا، د عملیاتو له پيل سره سلګونو کورنیو خپل کورونه پرېښي، ځېنې کورونه نړیدلي او اوس هم کورنۍ د کډوالۍ په حالت کې دي چې د دولت مرستو ته اړمنې دي.
امنیتي چارواکي وايي چې د پلخمري جوینو او احمدزيان د بغلان د طالبانو اصلي مرکزونه دي او طالبان په شمال کې خپل ټول جنګونه له همدې ځایونو نه رهبري کوي.
