د ولسي جرګې ګڼشمېر غړیو نن د دې جرګې په عمومي غونډه کې د ولسمشر د دویم مرستیال سرور دانش د هغو څرګندونو په تړاو غبرګونونه وښودل چې پرون یې په بامیان کې د طالبانو اسلامي امارت د سدوزیو او محمدزیو له واکمنیو سره پرتله کړ.
د ولسي جرګې غړیو د دانش دغه خبرې د افغانستان تاریخ ته سپکاوی وګاڼه او ویې ویل، دا ډول څرګندونې د دې لامل کېږي چې ملت له حکومت سره لا نور واټن ونیسي.
د ولسي جرګې د غړیو په خبره، ولسمشر او مرستیالان یې د سولې خبرواترو په روانو حساسو شرایطو کې داسې مسایل مطرح کوي چې له امله یې حکومت او ملت سره جلا کېدای شي.
د ولسي جرګې رییس میررحمان رحماني وویل، افغانان اوس ملي یووالي ته اړتیا لري او د حکومت یو لوړپوړی چارواکی باید له هغو څرګندونو ډډه وکړي چې خلک سره وېشي.
د ولسي جرګې یوه بل غړي شاپور احمدزي هم د سرور دانش پر څرګندونو د نیوکې ترڅنګ، هغه نامسوولانه وبللې.
د ولسي جرګې یوه بله غړې شینکۍ کړوخېله وايي، د افغانستان په تاریخ کې داسې طلايي پاڼې ډېرې دي چې له برکته یې نن د افغانستان په نوم هېواد شته.
د هغې په وینا، سرور دانش د هېواد تاریخ ته سپکاوی کړی او هغه باید د ولسمشر د دویم مرستیال په توګه له ورته څرګندونو ډډه وکړي.
دغه راز د خواله رسنیو یوشمېر کاروونکو هم د ولسمشر د دویم مرستیال څرګندونې غندلي او هغه یې د هېواد تاریخ ته سپکاوی بللی دی.
خو د ولسمشر دویم مرستیال سرور دانش نن په کابل کې د سولې نړیوالې ورځې نمانځغونډې ته په خبرو کې وویل چې د تېرې ورځې له خبرو نه یې موخه د جمهوریت او سلطنت پرتله کول و، نه تاریخ او کوم قوم ته سپکاوی. هغه زیاته کړه چې د افغانستان ټولو تاریخي شخصیتونو ته درناوی لري.
تر دې وړاندې هم یوشمېر حکومتي چارواکو په خپلو خبرو کې داسې ادبیات کارولي چې د لانجو لامل شوي او پراخ غبرګونونه یې را پارولي دي.
