.jpg)
د افغانستان ښځینه فوټبال ملي لوبډله د ۲ دوستانه فوټبال سیالیو ترسره کولو لهپاره اردن ته رسېدلي او سیالیو ته یې تمرینات پيل کړي دي.
د افغانستان فوټبال فدراسیون د رسنیو څانګې غړي شمس امیني سلاموطندار سره په خبرو کې وویل، په راتلونکیو اوونیو کې د افغانستان او اردن ښځینه فوټبال ملي لوبډلې ۲ دوستانه سیالۍ کوي.
ښاغلي امیني زیاته کړه، د دواړو ښځینه فوټبال ملي لوبډلو ترمنځ به لومړۍ لوبه د راتلونکې فېبرورۍ میاشتې په ۲مه او دوېمه لوبه د فېبرورۍ په ۵مه نېټه د اردن په کوربتوب ترسره شي.
نوموړي وویل، د افغانستان ښځینه فوټبال ملي لوبډلې په اردن کې د امریکایۍ روزونکې تر مدیریت لاندې خپل تمرینات پیل کړي دي.
له افغان ښځینه فوټبال ملي لوبډلې سره د امریکا ښځینه فوټبال ملي لوبډلې پخوانۍ لوبغاړې کیلي لینډسي هم د روزونکې په توګه دې سفر کې ملتیا کوي.
د روزونکې کیلي لینډسي په روزنه کې افغان ښځینه فوټبال ملي لوبډلې تراوسه ۵ سیالۍ ترسره کړي چې ۴ یې ګټلي او ۱ یې بایللې ده.
.jpg)
د فوټبال فدراسیون د رسنیو څانګې غړي وویل، په افغان ۲۵ کسیزه ښځینه فوټبال ملي لوبډله کې ۱۳ لوبغاړې د افغانستان او ۱۲ هغه نور د اروپا او امریکا څخه غوره شوي دي.
د شمس امیني په وینا، د افغانستان فوټبال فدراسیون د خپلې ښځینه فوټبال ملي لوبډلې د ظرفیت لوړولو په موخه دغه دوه دوستانه سیالۍ برابرې کړي ډي چې تمه لري ښې پایلې ترې ترلاسه کړي.
د یادونې ده چې د افغانستان ښځینه فوټبال ملي لوبډلې خپله لومړۍ نړیواله فوټبال سیالۍ په ۲۰۱۰ کال کې له نیپال سره کړه چې ۱۳ د ۰ ګول په وړاندې یې وبایلله او ترټولو ستره ماته یې شمېرل کېږي.
د افغانستان ښځینه فوټبال ملي لوبډلې ترټولو ستره بریا بیا ۴ د ۰ ګول په وړاندې د پاکستانۍ ښځینه فوټبال ملي لوبډلې خلاف ده خو له ۲۰۱۴ کال راهیسې یې له کوم هېواد ښځینه فوټبال ملي لوبډلې سره کومه نړیواله سیالۍ نه ده ترسره کړې.
د افغانستان ښځینه فوټبال ملي لوبډله اوسمهال د فوټبال نړیوالې شورا (فیفا) په درجه بندۍ کې ۱۰۶ خو اردنۍ فوټبال ملي لوبډله بیا ۵۰ مقام له ځان سره لري.
