د مخابراتو او مالوماتي ټکنالوجۍ او کورنیو چارو وزارت نن د ټرافيکي سېسټم برېښنايي کولو هوکړهلیک لاسلیک کړ.
د یادو وزارتونو چارواکیو وویل، دغه سېسټم به د ځیرک کارت په وسیله د نقلیه وسایطو لرونکیو او چلوونکیو سره د لایسنس او جوازسیر اخیستو پرمهال مرسته وکړي.
د مخابراتو او مالوماتي ټکنالوجۍ وزیر شهزادګل اریوبي وايي، دغه سېسټم به لومړی په کابل او وروسته په ټول هېواد کې جوړ شي چې په برېښنايي توګه د ښاري ټرافیکو سېسټم جوړولو ترڅنګ به په اړوندو ادارو کې د روڼتیا رامنځته کولو سره لازمه مرسته وکړي.
په همدې حال کې د کورنیو چارو وزیر ویساحمد برمک وايي، د یاد سېسټم په جوړولو سره به هغه ټول نقلیه وسایط چې هېواد ته را واردېږي، د دغه وزارت او د ټرافیکو عمومي ریاست تر څار لاندې وي.
د نوموړي په وینا، د ټرافیکو برېښنايي سېسټم د موټرو د جعلي اسنادو کارولو او فساد د مخنیوي ترڅنګ، د هېواد له امنیتي وضعیت سره هم مرسته کولی شي.
برمک زیاتوي، د دغه بهیر په پیلېدو سره به ټرانسپورټ وزارت او د هېواد ټول بندرونه له ټرافیکي برېښنايي سېسټم سره ونښلول شي.
د مخابراتو او مالوماتي ټکنالوجۍ او کورنیو چارو وزارتونو د مسوولانو په وینا، د ټرافیکي برېښنايي سېسټم هوکړهلیک موده چې د دواړو لوریو ترمنځ لاسلیک شو، ۲ کاله ده.
