ولسي جرګې نننۍ عمومي غونډې ته د افغانستان بانک مشر خلیل صدیق د ډالرو پر وړاندې د افغانیو بیې کمېدو، ځېنو ولایتونو کې د کلدارو او ایراني تومان ستونزې او د خصوصي بانکونو وضعیت په اړه ځواب ویلو ته ورغوښتی و.
د جرګې یو شمېر استازیو دغو موضوعاتو ته په اشارې، د افغانستان بانک له کړنو هم شکایت وکړ.
د ولسي جرګې دوه غړي عظیم محسني او میرداد نجرابي وايي، زموږ د ملي هویت پر ځای د نورو هېوادونو د کرنسیو کارول هغه جدي ستونزه ده چې ملي حاکمیت تر پوښتنې لاندې راولي. دوی پهدې برخه کې د بانک اداره کمزورې وګڼله.
د افغانستان بانک مشر خلیل صدیق د ولسي جرګې د پوښتنو په ځواب کې وویل چې د قانون پر بنسټ بازار کې د اسعارو د بیو تثبیتول د دې بانک دنده نهده.
ښاغلی صدیق د امریکايي ډالرو پر وړاندې د افغانیو د بیې د کمېدلو لامل د سوداګرۍ، صادراتو، وارداتو او کلني عاید کسر بولي.
د افغانستان بانک مشر په وینا، هېواد کې د سیاسي ثبات نهشتوالی او نړۍوالو بازارونو کې د ډالرو بیې لوړېدل هم، د ډالرو پر وړاندې د افغانیو د بیې کمېدلو لامل شویدی.
ښاغلی صدیق زیاتوي، دوی د تېر کال په پرتله روان کال کې بازار ته ۳۰۰ میلیونه اضافي ډالر او په ټوله کې ۱.۱ میلیارد ډالره وړاندې کړيدي.
د افغانستان بانک مشر په هېواد کې د بانکونو د وضعیت په اړه وايي، دولتي بانکونو کې د خدمتونو لوړولو لهپاره یو میکانیزم جوړ شوی او د خصوصي بانکونو هغه ونډه لرونکي چې د بانکي پورونو په چارو کې یې لاسوهنه کوله، برکناره شويدي.
د افغانستان بانک چارواکي ځېنو ولایتونو کې د پاکستانيو کلدارو او ایراني تومان اعتبار په اړه وايي، د قانون لهمخې هېڅ ډول خنډ نهشته او دغه موضوع ډېرو هېوادونو کې یو معمول کار دی.
