د کابل ولایت قره باغ ولسوالۍ ځينې اوسيدونکي وايي، چې په دغه ولسوالۍ کې د طالبانو فعالیتونه زیات شوي او دوی له پاره يې ژوند تریخ کړی دی.
دوی وايي، چې وسله وال طالبان د شپې له خوا شبنامې خپروي او دولتي کارکوونکي مجبوروي، چې خپلې وظیفې پريږدي.
د قره باغ یو تن اوسېدونکی د شاه مقصود په نامه وايي، چې د دغه ولسوالۍ ځينې اوسيدونکي د طالبانو د ګواښونو له امله خپل کلي پرې ايښي دي.
طالبان د قره باغ له اوسيدونکو غواړي، چې له دوی سره يوځای شي او د دولت له ملاتړه دې لاس واخلي.
دغه اوسيدونکي له حکومته غواړي، چې د طالبانو د فعالیت مخه دې ونیسي.
له بل لوري سیمه ییز چارواکي هم په قره باغ ولسوالۍ کې د طالبانو حضور تایدوي.
د قره باغ ولسوال سمیع شریفي سلام وطندار ته وویل، چې وسله وال طالبان په دغه ولسوالۍ کې مشخص مرکز نه لري، خو د شپې له خوا ډلې ډلې ګرځي او خلک ځوروي.
قره باغ د کابل یو له هغو ولسوالیو بلل کيږي، چې د کابل ـ پروان پر لویه لاره پرته ده او ددغه ولسوالۍ ناامن وضعیت به د دغو ولایتونو پر مسافرانو منفي اغیز وکړي.
