د ایران د بهرنیو چارو وزیر ډاکټر جواد ظریف وايي، چې افغانستان او ایران په ننګوونکې سیمه کې موقیعت لري او دغه راز ورځ تربلې پهکې د پردیو په لاسوهنو سره ترهګریز فعالیتونه ډېرېږي.
جواد ظریف وویل، چې په سیمه کې د ترهګرو د ځواکمنتیا حرکتونه هم موجود دي او دا ځواکمنتیا باید د دواړو هېوادونو په مرسته او ګډه مبارزه پرته له کوم تفکیکه له منځه یوړل شي او د ملاتړ مخه یې ونیول شي.
ظریف دغه څرګندونې د افغانستان د بهرنیو چارو وزیر صلاح الدین رباني سره په یوې ګډې خبري غونډه کې وکړې.
ډاکټر جواد ظریف دوو اړخیزو همکاریو په هدف کابل ته راغلی.
جواد ظریف وویل، کابل ـ تهران د ګډو همکاریو لهپاره ډېره زمینه لري؛ خو د ترهګرۍ، تاوتریخوالي، نشهيي توکیو، انساني قاچاق، د ترهګرو مالي ملاتړ که هغه د نشهیي توکیو او که د تورو پیسو له لارې وي باید په مقابل کې یې جدي مبارزه وشي.
د ایران د بهرنیو چارو وزیر افغانستان سره په اقتصادي او نورو برخو کې هم د همکاریو په دوام ټینګارو کړ.
دغه راز د افغانستان د بهرنیو چارو وزیر صلاحالدین رباني وویل، د ترهګرۍ تر ټولو زیات زیان اسلامي نړۍ، په ځانګړي ډول زموږ سیمې ته رسېږي، چې پر وړاندې یې باید جدي مبارزه پهکار ده.
رباني د ترهګرو زیان په برخه کې د بلخ شاهین قول اردو او دغه راز د ایران پوله ساتو ځواکونو وژنو ته اشاره وکړه.
صلاحالدین رباني وویل، د ترهګرو جرړې او تمویل سرچینې له افغانستانه بهر دي او نړیوال باید د هغوی د نابودولو په برخه کې جدي ګامونه واخلي.
نوموړی وايي، د ترهګرو پر خلاف مبارزه هغه مهال کامیابېږي، چې د نورو هېوادونو په پرتله اسلامي نړۍ د ترهګرو په برخه کې واحد تعریف پيدا کړي او له هر ډول تفکیک پرته تعقیب شي.
ټاکل شوې د ایران د بهرنیو چارو وزیر به له ولسمشر، اجرایوي رییس او د افغانستان د ملي امنیت شورا له مشر سره هم وګوري او په اړوندو مسایلو به خبرې وکړي.
د ایران د بهرنیو چارو وزیر پهداسې حال کې کابل ته راځي، چې په وار ـ وار ځېنو سیمهییزو چارواکیو او د ملي شورا یو شمېر غړیو له دې مخکې اندېښنه ښودلې، چې تهران د افغان دولت له مخالفو وسلهوالو ډلو سره د وسلو او مهماتو مرستې کوي.
د راپورنو له مخې، ایران په سرحدي سیمه کې طالب ډلګیو ته نظامي روزنه ورکوي.
