.jpg)
د فرانسې په کوربتوب ۱۵م پړاو فوټبال جام سیالۍ څلورم سیمي فاینل پړاو ته ورسېدلې، چې لا هم د اتلولۍ ګټلو چانس لري.
د فرانسې لوبډله وروستۍ هغه وه، چې ایسلینډ ته په ماتې ورکولو سره یې د نړیوال جام اتلې سرسختې سیالې المان فوټبال ملي لوبډلې پر خلاف د روان جام نیمه پای لوبو ته لاره پیدا کړه.
فرانسې د بېګا شپې په وروستۍ (کوارټر فاینل) لوبه کې چې ډېر ګولونه په کې ووهل شول؛ ۵ د ۲ ګولونو په وړاندې ایسلینډ ته ماتې ورکړه او په دې سره یې د یادې لوبډلې سفر پای ته ورسولو.
د فرانسې له پاره جیروډ دوه خو پوګبا، پایټ او ګریزمین یو – یو ګول وکړ، خو د ایسلینډ له پاره سایټروسن او بېجارناسن ګولونه ووهل.
.jpg)
فرانسه د اروپا فوټبال جام په تاریخ کې لومړۍ لوبډله ده، چې د سیالۍ په لومړۍ نیمایي کې یې ۴ ګولونو ووهل او دغه راز په سترو فوټبال جامونو کې یې له تیرو ۱۷ نړیوالو سیالیو راپه دې خوا هېڅ ماتې نه ده خوړلې، چې ۱۵ لوبې یې ګټلي او ۲ لوبې یې مساوي پای ته رسولې دي.
بل خوا د ایسلینډ فوټبال ملي لوبډلې بیا انګلستان فوټبال ملي لوبډلې ته په ماتې ورکولو سره د فرانسې پر خلاف کوارټرفاینل ته لاره پیدا کړې وه او په خپلو لوبو یې نه یوازې د خپل هېواد، بلکې په نړیواله کچه زړونه وګټل.
د اروپا فوټبال جام سیالیو د رسمي وېبپاڼې د معلوماتو له مخې چې پرتګال او ویلز او فرانسه او المان به په نیمه پای لوبو کې فاینل ته د رسېدو له پاره ولوبېږي.
د ورکړل شوي مهالوېش له مخې به د روانې جولای میاشتې پر ۶ مه نېټه د افغانستان پر وخت د شپې ۱۱ نیمې بجې پرتګال فاینل ته د رسېدو په پار له ویلز سره او د جولای پر ۷ مه نېټه المان له کوربه فرانسې فوټبال ملي لوبډلې سره دویمه نیمه پای لوبه وکړي.
