زبیا ګل د ژوند له ترخو کیسه کوي او وايي، په ۱۷کلنۍ کې یې د حزب اسلامي له یوغړي سره واده وکړ؛ یوازې یې له یو بل سره د ژوند څلور کلونه ګډ تېر کړل او په کورنیو جګړو کې یې خاوند ووژل شو.
مېرمن زیبا ګل وايي، په جنګونو کې یې هرڅه له لاسه ورکړل او د مېړه له مړینې وروسته له خپلو دوو کوچنیو لوڼو سره کابل ته ورکډه شول.
دردېدلې زیبا ګل له خپل دویم واده هم ښې خاطرې نه لري او دا ځل یې د جعیت اسلامي له غړي سره واده وکړ؛ د ژوند د خوشالیو غوټۍ یې لا نه وه سپړېدلې، چې تنظیمې جنګونو کونډه کړه.
نوموړې کیسه کوي، چې له دویم خاوند څخه د دوو نورو اولادونو مور شوه او زوی یې د ۱۶ ورځو و، چې پلار یې ومړ.
د مېرمن زیبا ګل دویم خاوند یو نظامي شخص و او د اختر په شپه د خپل معاش د راخیستلو له پاره تللی و، چې د ګلبدین حکمتیار په مشرۍ د حزب اسلامي وسله والو له خوا ونیول شو او تراوسه تری تم دی.
د دې مېرمنې په خبره، ۲۲ کاله کېږي، چې کونډه شوې.
دغه ګونډه وايي، د خپلو ماشومانو د یوې ډوډۍ روزۍ ګټلو له پاره په دولتي ادارو کې د خدمې په ډول کار کوي او په دې وروستیو کې په یو دفتر کې د مېرمنو د تلاشي کولو مسووله ده.
زیبا ګل وايي، تنظیمي جګړو یې دوه ځلې کور وران کړ او له حکومت غواړي، د دې جنګونو عاملین محاکمه کړي.
مېرمن زیبا ګل د حکمتیار له پخلاینې وېره لري او وايي، که بیا ځلي تنظیمي جنګونه پیل شي زره ګونه مېرمنې به کونډې او کورونه به یې در په در شي.
د نوموړې په باور هېڅکله دوه دوښمنان سره نه یوځای کېږي.
زبیا ګل د خپلو اولادونو د راتلونکي په اړه په داسې حال کې اندېښنه کوي، چې یو ځل یې په کورنیو نښتو کې د ژوند ملګري او کور له لاسه ورکړي او نه غواړي چې دا ځل یې د لاس په تڼاکو جوړ کړی کور ویجاړ شي.
په افغانستان د نوییمې لسیزې کورنیو جګړو په ځانګړي ډول کابل ښار کې د درنو اقتصادي زیانو تر څنګ زرګونه بېګناه انسان ووژل او بلاخره یې د طالبانو را تګ ته زمینه برابره کړه.
